محمد صبري غاضبا: السخرية من لاعبي الزمالك أمر غير مقبول.. ولابد أن يكون الرد قويا داخل الملعب

انتقد الإعلامي محمد صبري نجم الزمالك السابق، بعد التصريحات التي تخص التقليل من الفارس الأبيض هذا الموسم.

تصريحات محمد صبري

قال الإعلامي محمد صبري: “في ناس بتبقى عايزة لما تيجي تطلع تريند أو لما تيجي عايزة الناس تتكلم عنها أو الناس تبص لها، لازم تحط وتربط أي حاجة بالزمالك، قول أي حاجة هتلاقي نفسك بتنور وبتطلع تريند”.

وتابع عبر برنامج زملكاوي: “شخص ميوله أهلاوية، خلاص أنت حر ولك الاحترام كمان والتقدير، لكن لما تطلع في أحد البرامج وتقول: 'الزمالك أقصى طموحه وطموح جماهيره السنة دي إنه ياخد المركز الثالث”.

وأكمل: “أولًا أنا والله ما أعرف الصفة عشان أقول لك صفتك كإعلامي ولا محلل رياضي ولا محلل، ما أعرفش الصفة بالضبط يعني اعذرني ده جهل مني”.

وواصل: “لكن لما تيجي تسخر من نادي اسمه الزمالك وتقول إن الزمالك طموحاته إنه ينافس على المركز الثالث، هقول لك أنا بقى مين الزمالك، أو اسأل والدك مين الزمالك، أو اسأل جدك مين الزمالك”.

الإعلامي محمد صبري

وأضاف: “وهنا بقى عندي رسالة للاعيبة الزمالك، عندي رسالة للجهاز الفني للزمالك، الكلام اللي بيتقال ده ولسه هيتقال، واللي اتقال قبل كده واللي اتقال دلوقتي عن الزمالك وعنكم، لازم يكون حافز كبير جدًا ليكم بقى، لازم يكون دافع كبير جدًا ليكم بقى وتردوا لنا في الملعب”.

وزاد: “لازم تردوا لنا في الملعب، لازم تتوجوا إن شاء الله السنة دي ببطولة الدوري وتشاركوا في بطولة أفريقيا، وأنا هبص على كل حاجة، كل حاجة هاخدها السنة دي إن شاء الله بمشيئة الرحمن، بفضل ربنا وجمهور الزمالك”. 

وأكد: “لازم كمان اللاعيبة بقى تتحرك معانا، لازم الجهاز الفني يصحصح معانا، لازم تثبتوا إن أنتم أبطال، لازم تثبتوا إن أنتم لاعيبة كبيرة، لازم تثبتوا إن أنتم سكواد محترم”.

وأتم حديثه: “إحنا قلنا كده، قلنا كده من أول الموسم ومبنضحكش على حد ومبنضحكش عليكم ومبنضحكش على نفسنا، وإحنا عندنا أحسن سكواد، أيوه عندنا أحسن سكواد وعايز يتظبط شوية، الدنيا عايزة تتظبط شوية، هتمشي وهتتظبط”.