محمد صبري: نريد تصحيح المسار في الزمالك.. ومجلس الإدارة أمام اختبار صعب الآن

أعرب محمد صبري نجم الزمالك السابق، عن حزنه بسبب نتائج الفارس الأبيض الأخيرة، وتراجع الأداء والخسارة في مباراة القمة.

تصريحات محمد صبري

قال محمد صبري: “طب عايزين دلوقتي بقى نصحح المسار، ونرجع فرقتنا على المسار وعلى التراك الصحيح”.

وتابع عبر برنامج زملكاوي: “نروح لمين بقى ونتكلم مع مين، أولًا مجلس إدارة نادي الزمالك برئاسة الكابتن حسين لبيب، معاه طبعًا المدير الرياضي لنادي الزمالك مستر جون إدوارد، لما يكون عندنا مشكلة جوه الفرقة والنتائج مش كويسة يبقى بنلجأ للاثنين دول”.

وأكمل: “وأنا بقولهم من هنا قدام حضراتكم اختبار صعب جدًا، لازم نرجع فرقتنا للانتصارات تاني ويتحطوا على التراك صح ونطمن جماهيرنا علشان منفقدش جماهيرنا في الماتشات الجاية، لإن دول أهم عنصر”.

وواصل: “كلنا كزملكاوية عارفين إن دول أهم عنصر في المنظومة من بداية الدوري، لا من قبل ما نبدأ الدوري كمان وإحنا بنعمل الفرقة اللي إحنا بنعملها دلوقتي أو اللي إحنا عملناها دلوقتي، كنا بنقول دايمًا إن الفرقة وهي بتتعمل اللي هيدعمها هو الجمهور، اللي هيساعدها هو الجمهور عمل كده”.

محمد صبري نجم الزمالك السابق

وأضاف: “أيوه عمل كده النتائج، نتائج مكنتش كويسة، أيوه مكنتش كويسة، فبالتالي هنلجأ لمجلس الإدارة برئاسة الكابتن حسين وجون إدوارد، لو سمحتوا رجعوا لنا الفرقة للمسار الصحيح اللي بدأنا بيه باللاعيبة اللي كانت موجودة في الملعب اللي زودت طموح جمهور الزمالك، قالوا لأ إحنا معانا فرقة”.

وأشار: “وإحنا فعلًا معانا فرقة، معانا سكواد، أيوة معانا سكواد، لكن عندنا مشاكل فنية. اللي يعالجها مين، مش إحنا كجماهير، دي مش مسؤوليتنا دي”.

وأتم: “مسؤولية مين، مسؤولية مجلس إدارة نادي الزمالك مع المدير الرياضي لنادي الزمالك جون إدوارد، فبالتالي عندكم مسؤولية ومسؤولية كبيرة جدًا لعودة الزمالك، ولاعيبة الزمالك للطريق الصحيح”.