عمر كمال يستغيث بالأزهر .. كلمة السر الغناء

نشر المطرب عمر كمال فيديو له وهو يستغيث من الشيخ الأزهر، مشيرا، أنه شعر بتعب نفسي بسبب كلام الناس.

قال عمر كمال، خلال مقطع فيديو عبر حسابه الشخصي بموقع التيك توك: تعبت نفسيًا من كلام الناس اللي بتقول إن ربنا مش هيقبل مني الخير اللي بعمله عشان فلوسي حرام.

وأضاف عمر كمال: أنا عايز شيخ من الأزهر يرد عليا ويقول لي إذا كنت غلطان ولا لأ، لو غلطان هبطل أعمل خير تاني بالرغم إني شايل مسؤولية فرقتي وعيلتي كلها.

وأضاف عمر كمال: أنا مش بعمل فيديوهات خالص بره الغناء والكلام ده كله عمري ما عملت فيديو في الخير أو أطلع تريند في الخير أو أعمل حاجة خير وأطلع عليها تريند وأركب عليها مبحبش كده، أنا مقتنع الخير في السر ده ربنا بيكرم عنه أضعاف اللي في العلن.

وأردف: أنا ربنا كرمنى آخر كرم عشان علاقتى بربنا كويسة أنا أظن كده، تعبت من الناس نفسيًا جامد أوي وعايز حد من الأزهر يطلع يرد عليا يا ريت أي شيخ من الأزهر يطلع يرد عليا أي حاجة بعملها في حياتي، بعمل أي غلط أنا بروح أعمل فرح أو أغني في حفلة تخرج عمري ما طلعت قلت في حياتي إني بساعد أو بعمل خير لحد.

واختتم عمر كمال: شايل مسؤولية فرقتي وعيلتي كلها وفاتح أكتر من 50 أو 60 بيت غير الناس اللى حواليه شايل مسوؤليتها.. طب أنا فلوسي حرام الناس اللي بتنتقد بقى عملت إيه في حياتها ساعدت ناس أو دفعت فلوس عمليات أو دفعت إيجار لحد، أنا بعمل كل ده ومش بطلع أتكلم في الخير.

تعد أغنية إحنا البلد، آخر أعمال عمر كمال، والأغنية من كلمات مصطفى الجن، ألحان حسن إش إش، وتوزيع أشرف البرنس، وتم تصويرها بطريقة الفيديو كليب من إخراج حسام مجدي.

في وقت سابق، كشف عمر كمال، عن الشخص الذي يعتبره وش الخير عليه في مشواره الفني، إذا أشار إلى أن الفنان محمود الليثي هو أول من قدم لهُ الدعم في مشواره.

ونشر عمر كمال عبر حسابه الرسمي بـ بموقع التواصل الاجتماعي فيسبوك صورة له رفقة الفنان محمود الليثي وعلق عليها قائلًا: لما كنت صغير كنت بسمعه وكنت بلف وراه أتعلم الغنا منه، ولما كبرت شوية وبدأت أشتغل كنت بغني أغانيه وباكل بيها عيش وبتقرب للجمهور بشغله، ولما ربنا كرمني وفتحها عليا من وسع وقفني جنبه وغنيت معاه وربنا جعل وشه حلو ليا، أنا بحب محمود الليثى جدا عشان كان معايا في معظم مراحل حياتي، 20 سنة محمود الليثي حاجة أساسية في يومي، ربنا يخليك ليا وميحرمنيش من وجودك في حياتي.