آية سماحة: قالوا عليا إني حامل بسبب إني تقلت في الأكل شوية

كشفت الفنانة آية سماحة عن أغرب شائعة تعرضت لها مؤخرا، كاشفة عن سبب تأجيلها لقرار الإنجاب.

قالت آية سماحة: "أنا طلع عليّ إشاعة إن أنا حامل، أنا اتعشيت أسبوع جامد، اتعشيت لازنيا وسكلوب 6 7 مرات، دا اللي تخني بس بخسهم بسرعة جدا"، حسب تصريحاتها لبرنامج "أسرار النجوم"، الذي تقدمه الإعلامية إنجي علي عبر راديو "نجوم FM".

وتابعت: قرار الإنجاب مؤجل بالنسبة لي، خايفة جدا، مسئولية مش كل حد مؤهل ليها خالص، ممكن أجي الحياة وأمشي وأنا معملتهاش ودا مش تقصير مني، هي فكرة إن كل واحد قادر يعمل دا ولا لأ، ولحد دلوقتي حاسة إنه لأ.

وأضافت آية سماحة: هذه الخطوة لها تحضيرات كثيرة جدا، لازم أبقى واقفة على أرض صلبة، مش الخطوة التالية بعد الزواج هي الإنجاب، ولازم أبقى فاهمة البني آدم دا أنا هديله إيه، هل أنا مبسوطة ولا لأ، هو هيبقى تمام ولا لأ، معرفش كلها أسئلة صعبة يعني مقدرش أجاوب عليها دلوقتي فقولت لأ مش هعمل كدة.

واختتمت آية سماحة حديثها قائلة: "أنا مدية الشغلانة كتير أوي، وأكيد كل حاجة ليها وقتها وهتيجي في الوقت اللي ربنا شايفه صح".

يذكر أن آية سماحة لفتت الأنظار مؤخرا بدورها في مسلسل "عمر أفندي"، الذي قدمت من خلاله دور راقصة.

مسلسل "عمر أفندي" بطولة أحمد حاتم، رانيا يوسف، آية سماحة، مصطفى أبو سريع، محمد رضوان، ميمي جمال، ومحمود حافظ، ميران عبد الوارث، إسماعيل فرغلي، والمسلسل من تأليف مصطفى حمدي، وإخراج عبد الرحمن أبو غزالة.