خلال ندوة صحفية بموقع بصراحة| محمد هاني يشيد بـ الإعلامي محمود سعد: من أهم وأجمل وأنجح الصحفيين اللي اشتغلوا في التلفزيون

أشاد الكاتب الصحفي الكبير محمد هاني، بالإعلامي محمود سعد، مشيرًا إلى أنه هو من صنع جماهيرية برنامج "البيت بيتك"، بشخصيته الجذابة.

وقال محمد هاني خلال ندوة خاصة بموقع بصراحة الاخباري: " محمود سعد من أهم وأجمل وأنجح الصحفيين اللي اشتغلوا في التلفزيون، وهو اللي صنع جماهيرية البيت بيتك، بشخصيته الجماهيرية وهو اللي جذب ليه ناس كتيرة جدًا، لأن هذا المذيع القريب جدًا من الناس وبيتكلم بلغة الشارع وأناقته في الأسلوب والحوار".

وأضاف: "تخيل كل اللي بقوله عليه، لكن مكنش بيتقال برنامج محمود سعد، كان بيتقال البيت بيتك، مش كل البرامج كانت معروفة بأسمائها، أنا كصانع أحب جدًا البرنامج يعرف باسمه، وبعتبر النجاح العظيم يكون للي بيقدم البرنامج واسمه يعلو وتبدعني شخصيا وتعاملت مع أغلبهم من 1949 لحد دلوقتي، فكرة أن برنامج يعرف باسمه دي مهمة".

وواصل: "حديث القاهرة أنا اللي اخترته، وبرنامج هنا العاصمة اختيار مشترك وهو برنامج لنيس الحديدي، وكنت بتكلم أنا وهي وندي اقتراحات، وحتى الـ CBC كانت هتبقى العاصمة، ومنفعش لأن كان في قناة كده، فاستقرينا على CBC ، وهي مركز تلفزيون العاصمة، وده اختياري كاسم وكان وقتها تفكير أن اسمها يكون عربي أكتر بس بصرف النظر الحاجة بتكتسب مصدقيتها وشهرتها من اللي بتقدمه".

ويعد الكاتب الصحفى والإعلامى محمد هانى واحد من صناع الإعلام فى مصر والعالم العربى ، حيث ترأس عدد كبير من البرامج التليفزيونية أبرزها برنامج البيت بيتك ، كما أسس وتولى إدارة قناة cbc، ونجح خلال تواجده فى تحقيق انتشار واسع ونجاح.