خلال ندوة صحفية بموقع بصراحة محمد هاني: روز اليوسف جنسيتي.. وهالة سرحان هي اللي دخلتني التلفزيون

كشف الكاتب الصحفي الكبير محمد هاني، عن بداية تجربته في الصحافة والتليفزيون، مشيرًا إلى أن جنسيته الصحفية هى "روز اليوسف"، والدكتورة هالة سرحان هي سبب خوضه تجربة التلفزيون.

وقال محمد هاني خلال ندوة خاصة بموقع بصراحة الاخباري: "أنا مواطن من روز اليوسف وهى جنسيتي لأنها مش مجرد جريدة أو مجلة اشتغلت فيها، وجيلي كان عنده مواهب كثيرة منهم "إبراهيم عيسى، وائل اللإبراشي، عبدالله كمال، عمرو خفاجي" وغيرهم، وكان بيقودنا الأستاذ عادل حمودة، في مرحلة بداية التسعينات، وكانت فيها تجربة قوية جدًا لروز اليوسف، وكانت بداية حياتنا وكان عندنا طموح وقوة كبيرة واتنازلنا عن أشياء خاصة عشان نوصل".

وأضاف: "في التلفزيون تجربتي كانت مع الدكتورة هالة سرحان، وهي اللي علمتني شغل التلفزيون، وعرفتني ايه الفرق بين أنك تبقى صحفي في مجلة، أو صحفي في برنامج تلفزيوني، وكانت معاها بداية التوك شو، وعملته معاها بشكل حديث جدًا وأزعم أن في اللحظة اللي بنتكلم فيها دي أن في أشكال تلفزيونية عملتها هالة سرحان سابقة اللي موجود دلوقتي، وأنا الحقيقة معرفش ليه الحاجات دي مش موجوده، لأن برامجها كانت جماهيرية بالمعنى الحقيقي".

وواصل: "دكتورة هالة عملت نماذج كتير للبرامج، وعملت حوار الون وان، كان اسمه بصراحة، والمعد الرئيسي بتاعه كان وائل الإبراشي، وكنا تلاتة بشكل أساسي عمرو خفاجي ووائل وأنا، وكنا التلاتة أصدقاء، فالتجربة بالنسبة لي كانت مهمة جدًا وعلمتني يعني ايه تلفزيون وأخرج ازاي منتج تلفزيوني".

وعن سبب خوضه تجربة التلفزيون قال: "الدكتورة هالة كانت بتكتب مقال لفترة في روز اليوسف، وأنا كنت هناك وكان أحد مهمامي أني اتملى المقال من الدكتورة هالة على التليفون، ثم بعد كده اتعينت في روز اليوسف واتوليت رئاسة قسم الفن والثقافة، وهي ظلت تكتب فكنت أنا بتفق معاها على المقالات ثم هي عملة تجربة لمجلة أسرة أسمها سيداتي أنساتي، ثم بعد شهر قالتلي هتطلع محطة تلفزيون جديدة اسمها art، ولشيخ صالح كامل هو صاحب المحطة وأنا عايزاك معايا، فقولتلها أنا صحفي كان ليا تجربة في الإعداد ومطولتش قالتلي تعالى، عملت معاها أول حاجة يا هلا، وبعد كده برنامج الليلة ثم بصراحة".

وتابع: "دكتورة هالة قالتلي شايف مين أسامي يجوا معانا هيئة تحرير البرامج، قولتلها "عمرو خفاجي، ووائل الإبراشي"، قالتلي اه عارفاهم دول هايلين جدًا ومن أول لحظة أصبحوا أنهم يعرفوا الدكتورة هالة من بعيد وأصبحنا فريق لا ينفصل، وبعد كده هي اكتشفت وائل الإبراشي وبقى مذيع من خلال بصراحة، وبعد كده الحقيقة ووائل استمر في الحقيقة، وعمرو خفاجي عمل برنامج "استديو مصر"، كان فني نقدي ممتاز جدًا وأنا كملت معاها في روتانا".ويعد الكاتب الصحفى والإعلامى محمد هانى واحد من صناع الإعلام فى مصر والعالم العربى ، حيث ترأس عدد كبير من البرامج التليفزيونية أبرزها برنامج البيت بيتك ، كما أسس وتولى إدارة قناة cbc ، ونجح خلال تواجده فى تحقيق انتشار واسع ونجاح.