خلال ندوة صحفية بموقع بصراحة| محمد هاني: الإسلام السياسي أهم قضية محورية ناقشها وحيد حامد.. ووفاته لم تكن خسارة شخصية

تحدث الكاتب الصحفي الكبير محمد هاني، عن أهم الأعمال للراحل وحيد حامد، مشيرًا إلى أن الإسلام السياسي هى أهم قضية محورية ناقشها.

وقال محمد هاني خلال ندوة خاصة بموقع بصراحة الاخباري: "طيور الظلام هو أهم عمل لوحيد حامد، والإرهاب والكباب لم يكن له علاقة بالجماعات الإسلامية ولا التطرف، والجماعة وحيد هو أداله طاقة كبيرة جدًا، وده كان أكتر عمل، وأهم كتاباته في الصحافة كانت عليه، وآخر حاجة كان بيكتبها الجزء الثالث من الجماعة وكان 7 حلقات، وكانت دي المرحلة الأصعب والتي بدأت بتولي الرئيس السادات إلى اغتياله، فدي القضية المحورية".

وأضاف: "كل مقالاته كانت كده، وأهم المقالات ليه كانت «القرود الخمسة» سنة حكم الإخوان وكتب فيه عن النماذج الخمسة ووصف تفصيلي ليهم مقال بديع أسلوبًا وثقافة، وخطير من الناحية السياسية".

وعن الأشياء التي تعلمها من وحيد حامد قال: "لما بتقترب من شخص كبير على مدى زمني مش قليل مش بتحس ايه بالظبط اللي أضافة لشخصيتك، بحيث أنك تقول والله ده أضاف ليا واحد واتنين، لا أنت بيتسلل ليك حاجات كتيرة مش بتحسها، وأعتقد طريقة التفكير وخبرات تقدير الموقف وإدارة الأزمات دي أكتر حاجة اتعلمتها منه، ووحيد كان شخصية صريحة إلى أقصى حد والانسان كان حصيلة خبرات الأخرين، وكل ما بتعمل عدد أكبر من الحورات بتخش داخل الشخص اللي بتعمل معاه وبتاخد من خبراته".

وواصل: "وحيد حامد كان شخصية صريحة لأقصى حد، والإحساس الانساني موجود عند بعض الناس وناس تانية لأ، هو كان عنده حس عاطفي كبير، فلما توصل لدرجة مثلًا زي اللي وصلها وحيد وتظل الناحية الانسانية يقظة ومتوهجة ولم تتأثر فهى دي كانت عنده وبشده".

وأختتم محمد هاني حديثه عن وحيد حامد بكيفية استقباله خبر وفاته، قائلًا: " وفاته مكنتش خسارة شخصية كان خسارة للبلد كلها، وطول الوقت هيفضل في أجيال بتسلم أجيال وكل حاجة، بس لما تحصل فرصة ونشتغل مع بعض طب زعل وده اللي استقبلت بيه خبر وفاته حزنت عليه حزن شخصي كبير، والأستاذ هيكل برضوه حزنت عليه كتير لا يقل عن خسارة والدتي اللي توفت في نفس السنة".

ويعد الكاتب الصحفى والإعلامى محمد هانى واحد من صناع الإعلام فى مصر والعالم العربى ، حيث ترأس عدد كبير من البرامج التليفزيونية أبرزها برنامج البيت بيتك ، كما أسس وتولى إدارة قناة cbc ، ونجح خلال تواجده فى تحقيق انتشار واسع ونجاح.