أسامة نبيه : مش لازم أطلع أقول للجمهور أنا فشلت وأنا عملت إنجازات مع منتخب الشباب

يري أسامة نبيه نجم الزمالك ومنتخب مصر الأسبق أن تصريحاته تم تفسيرها بشكل خاطئ بعد رحيله عن منتخب الشباب.
وقال أسامة نبيه الذى يحل ضيفاً على برنامج "النجوم في رمضان":" الناس كانت عايزة تسمع منى بعد رحيلى عن منتخب الشباب أنا فاشل ، وانا طلعت قولت حصل اخفاق وعدم توفيق ، اختلفوا معايا مع ان مش لازم أطلع أقول للجمهور انا فشلت"

ويضيف:" شغل المنتخبات مختلف عن شغل الأندية ، تجربتى مع منتخب الشباب ليها وعليها بس محدش بيقول ان منتخب الشباب اتاهل لكأس العالم بعد 12 سنة غياب من أيام جيل ربيع ياسين ".
وتابع:" مش ندمان على تجربتى مع منتخب الشباب ، لان فيها إنجازات انا تاسع مدرب قاد منتخب شباب على مدار 50 سنة ، كنت محتاج فترة زمنية وتأهيل وتجهيز وخرجت من كأس العالم بسبب الكروت الصفراء"

وأكمل :"الناس خدت تصريحاتى بغرابة عشان قولت منقدرش نكسب اليابان ، محدش سمع منى انا ليه قولت كدا ، صحفى كبير طلع كتب أسامة نبيه مش عارف الفرق بين مصر واليابان فقولتله اه انا مش عارف الفرق ، لما تتوفر الظروف المهيئة لمنتخب مصر زي اليابان وقتها هعرف الفرق"

وتُقدم الإعلامية الكبيرة نجلاء حلمي برنامج "النجوم في رمضان" عبر إذاعة الشباب والرياضة، ويترأس فريق تحريره الكاتب الصحفي وليد قاسم ويذاع أيام الجمعة والسبت والأحد والثلاثاء طوال شهر رمضان المبارك.