التوأم مش هيتهونوا في كأس العالم.. سيف زاهر يكشف مايدور في ذهن حسام حسن

كشف الإعلامي سيف زاهر عن ملامح استراتيجية الجهاز الفني لمنتخب مصر بقيادة حسام حسن خلال الفترة المقبلة، مؤكدًا أن المدير الفني يبحث بشكل مكثف عن عناصر جديدة يمكنها تقديم إضافة حقيقية للكرة المصرية.

تصريحات سيف زاهر 

 وقال سيف زاهر أن"كابتن حسام حسن بيدور على لعيبة وعاوز يقدم حاجة جديدة للكرة المصرية، هو دلوقتي مش لاقي بس بيدور، لو فيه حاجة ظهرت هياخدها، كابتن حسام عاوز يقول أنا قدمت لاعب واتنين وتلاتة".

وأشار إلى أن التزام اللاعبين داخل معسكرات المنتخب سيكون غير قابل للتهاون، قائلاً: "بعد حديث شخصي مع إبراهيم حسن.. النملة مش هتعدي معسكر المنتخب الفترة الجاية، حتى لو هاني أبو ريدة معدّي بالعربية.. العربية تتفتش عادي".

مفيش تهاون في كأس العالم 

وأوضح سيف زاهر أن الجهاز الفني لن يسمح بأي تهاون أو تجاوز داخل المنتخب: "الشغلانة عمرها ما كانت ماشية كده، حديثنا عن أي لاعب في منتخب مصر مهم ومصلحة ليه. في لاعيبة دماغها كبرت وبقت تقول مش هصوّر ومش هطلع على التلفزيون.. لأ، الأمور لازم تبقى واضحة من البداية".

"الفترة اللي جاية كله يشغل المكن، محدش ييجي يقول المكن واقف، حسام حسن وجهازه عاوزين يعملوا كل حاجة للشعب المصري".