معتمد جمال يتحدث عن فوز الزمالك أمام المصري بالكونفدرالية

تحدث معتمد جمال، المدير الفني لنادي الزمالك، عن كواليس عمله داخل الفريق في ظل الظروف الصعبة التي يمر بها النادي، وذلك خلال ظهوره ببرنامج الكورة مع فايق على قناة MBC مصر 2.

تصريحات معتمد جمال

وقال معتمد جمال: "الحمد لله، كلامي دايمًا مع اللاعبين بمنتهى الهدوء، وهما مصدقيني جدًا، وكل اللي بقوله بننفذه. ولما وعدتهم إن كل الناس هتلعب، الحمد لله خلال أربع مباريات تقريبًا كل اللاعبين شاركوا باستثناء حالات قليلة".

وأضاف أن الظروف القاسية تدفعه دائمًا للاعتماد على دعم الجماهير: "لما الدنيا بتبقى صعبة، بسند على جمهور الزمالك اللي عمره ما خذلني، وده داعم كبير لينا. أي نادي غير الزمالك وفي الظروف دي مكنتش هتلاقي الجمهور موجود بالشكل ده".

وأشار المدير الفني إلى أهمية الانتماء للكيان: "تيشرت نادي الزمالك لوحده دافع كبير، وأنا بشتغل مع اللاعبين فنيًا ونفسيًا عشان نطلع منهم أفضل حاجة في ظل معادلة صعبة جدًا".

وعن مشاركة اللاعبين الشباب، قال: "الولاد رغم قلة الخبرة بيبذلوا مجهود كبير وبيحسوا بالتعب من مباراة للتانية، وأنا راضي عنهم تمامًا حتى لو قدموا أقل من كده، لأن أنا فعليًا رميتهم في النار".

معتمد جمال يكشف حالة المصابين 

وفيما يخص المصابين، كشف معتمد جمال: "حالة المصابين لسه مش أحسن حاجة. أخذنا دونجا وعبدالله السعيد مع المعسكر عشان يعملوا دفعة معنوية ولكن كان الاتفاق يلعبوا 20 أو 25 دقيقة فقط".

كما فجر مفاجأة عن معاناة الفريق من نزلات برد خلال المباريات الأخيرة: "معظم الفريق كان عنده برد شديد، محمد السيد، ناصر منسي، وسيف الجزيري خرج بسبب البرد. كلهم واخدين مضادات حيوية عشان يكونوا موجودين".

واختتم المدير الفني حديثه مؤكدًا انتماءه للفريق: "أنا مشجع قبل ما أكون مدرب، وبإذن الله الفترة الجاية هنعمل أحسن حاجة عشان نرجع الزمالك لوضعه الطبيعي".