لايف موقع بصراحة| «انا عايز حقي يا حكومة».. استغاثة العم بكر ضحية خطيب بنته بعد الاعتداء عليه داخل المسجد بالبحيرة

شهدت محافظة البحيرة واقعة مؤسفة، إذ اعتدى شاب على رجل مسن يبلغ من العمر 66 عامًا داخل أحد المساجد عقب انتهاء صلاة الجمعة.

 العم بكر: "بعد صلاة الجمعة، لقيت عصاية على دماغي، ومحستش بنفسي".

قال العم بكر  في تصريحات خاصة لموقع بصراحة: “بعد الصلاة في المسجد، لقيته جاي عليّ وبدأ يشتم، وفجأة لقيت العصاية على دماغي، ومحستش بنفسي. دماغي وهدومي كلها كانت دم، والواقعة كلها كانت متصورة بالكاميرا”.

وأضاف : "أهل الولد اللي اعتدى عليّ جُم وخدوه بالعربية بواسطة عمه وأبوه، وكل ده شوفته في تفريغ الكاميرات".

وتابع: "بعدها روحت المستشفى، عملت أشعة مقطعية وخيّطولي الجرح، وبعدها طلعت على القسم مع ضابط المباحث وعملت المحضر".

 العم بكر: "كان خاطب بنتي لمدة سنتين، لكن حصل خلاف وكل واحد راح لحاله".

واستكمل حديثه قائلًا: "هو كان خاطب بنتي لمدة سنتين، وكانوا قربوا على الجواز، وجبت كل جهاز بنتي، لكن حصل خلاف وكل واحد راح لحاله".

وأضاف: "وفي قعدة عرفية اتفقنا ناخد 60 ألف جنيه، لكن في الآخر خدنا 40 ألف عشان مش عايز مشاكل، وكل واحد يروح لحاله، والكلام ده من حوالي خمس شهور، ومكنش في أي مشاكل بينا لحد يوم الواقعة".

واختتم العم بكر حديثه لموقع بصراحة قائلًا: “أنا راجل كبير ومش طالب غير حقي، كنت داخل أصلي في بيت ربنا، ومكنش بيني وبينه أي حاجة من يوم ما بنتي سابته، وكلهم من دور أولادي”.