خالد الجوادي: كولر جعلني منسق للجهاز الفني.. وكابتن الخطيب ألغى هذا القرار

تحدث خالد الجوادي المترجم السابق للمدير الفني للنادي الأهلي، عن أسباب أزمته، ورحيله عن القلعة الحمراء.

تصريحات خالد الجوادي

بدأ خالد الجوادي حديثه: “كولر شاف فيا إمكانيات معينة، والموسم التاني مع كولر كنت مصدر معلومات مهم بالنسباله، سواء تخص اللعيبة أو الأهلي والتاريخ أو الفرق اللي بنلاعبها وخلاني منسق للجهاز الفني السويسري بالكامل مع باقي الاجهزة الطبية او الادارية”.

وأوضح: “مثلا تتسيان مدرب الأحمال عايز دكتور التغذية يعمله بلان معينة خاصة باللعيبة، فأنا كنت بروح أبلغ وأقوله كولر بيقول لحضرتك احنا محتاجين كذا كذا”.

وتابع عبر بودكاست الإيجيبشين ليج: “للأسف دي اتفهمت غلط، والبعض فهمها أن أنا اللي بدي الأوامر، دي لكن أنا مكنتش غير منسق أو وسيط بين الجهاز وباقي الأفراد، بما أني الشخص اللي بعرف أترجم”.

أزمة خالد الجوادي في الأهلي

وواصل: “كابتن الخطيب قعد معايا وقالي مش مناسب للنادي الأهلي أن مترجم يبقى عنده الصلاحيات دي، قلت له يا كابتن أنا مش بدي أوامر، أنا بنقل طلبات الراجل أو الجهاز مش أكتر والكابتن قال لي حاول تغير الموضوع ده عشان ميتفسرش غلط”.

وأكمل: “حاولت فعلا لما أطلب أي حاجة على لسان كولر يكون جنبي، بس مش دايما كانت بتظبط وحاولنا نعملها عن طريق مدير الكورة كابتن خالد بيبو، برضه الوقت كان بيطول خصوصا انه عنده شغل كتير جدا، فأنا بقيت بين ناريين”.

وأضاف: “كولر عايز طلباته تتعمل وأنا مش قادر أقوله لا، وفي نفس الوقت أنا مش عايز أزعل النادي الأهلي واللي هو أولى ليا، فقلت لكابتن الخطيب، بلغ كولر ميطلبش مني أبلغ حد بحاجة هو عايزها فقالي ترجمله وقوله كده والراجل قال تمام”. 

وأتم: “بس فعلا مكانش قادر أنه يعمل ده، ولما اتكلمت أنا وكولر من كام أسبوع، قالي من الحاجات اللي أنا غلطت فيها أني حملت عليك بمهمات كتير جدا، ومحمتكش في نفس الوقت وموضحتش أني أنا اللي بديك الأوردر وبقولك تعمل الحاجات دي، وأنك معايا كنت منسق للجهاز مش مترجم بس”.