خالد الجوادي: الخطيب وفر كل شيء لمارسيل كولر.. واهتمام السويسري بالتفاصيل كبير جدا "مرعب"

تحدث خالد الجوادي مترجم السويسري مارسيل كولر المدير الفني السابق للنادي الأهلي، عن دور كابتن محمود الخطيب في اختيار المدير الفني للنادي الأهلي.

تصريحات خالد الجوادي

قال خالد الجوادي: “اللوم الدائم علي الخطيب أنه لازم يمشي رأيه وأن المدرب يبقي ضعيف، المدرب في النادي الاهلي معتقدش حتي في أوروبا أنهم ماشوفش ده، المدرب بياخد صلاحيات في النادي الأهلي مش محدودة صلاحيات كبيرة جدا”.

وتابع عبر بودكاست الإيجيبشين ليج: “في الأهلي بيتوفر للمدرب صلاحيات وقدرات وأدوات غير محدودة للنجاح، وكابتن محمود بنفسه بيحاول المدرب ينجح طلباته، لبن العصفور بيتجاب أي حاجة بتطلب والمدرب بيفكر فيها نقدر نعملها نعملها”.

وواصل: “أدوات تدريب في فترة كان الراجل عاوز يجيب ضربات الرأس، وحصل مشكلة في شحنه وهو كان عامود 8 متر، عقبال ما نشحنه ونجيبه ما نحاول نصنعه”.

وأكمل: “الكابتن الخطيب جاب شركة وقعد معاهم وقعده مع كولر، وخلي الراجل يقعد مع الناس ويعرضوا عليه وقعده مع مصنع متخصص، رسم الشكل والخامات اللي هو عاوزها، واتنفذ واتعمل منتج مصري مطلعش بالظبط زي ماهو عاوز عشان اختلاف الخامات، لأن الخامات مكنتش مصر اشتغلنا بيها شوية لحد ما الجهاز يجيي من ألمانيا”. 

وزاد: “حتي موضوع الغسالات اتغيرت واتجاب مجفف واتعمل اللي الراجل عاوزه، كل التفاصيل اللي الراجل بيقولها لو في هامش للتحسن نعمله، أمال احنا بنجيب مدرب أجنبي ليه”.

وأضاف: “كولر أول ما جيه في تفاصيل صغيرة الناس لو سمعتها تضحك، كان بيعلق علي حاجات الناس، والناس بتقوله إيه يا عم ده ، يعني بيعلق علي الغسالات في النادي صغيرة شوية مش عاجباه لأن الحجم الصغيرة هيضطروا يغسلوا دورتين”.

وأتم: “ده من وجهة نظره، يخلي اللبس ريحته مش أحسن حاجة لما يتنشر، يا عم الحج أنت بتكلم عن حتت بعيدة شويتين، لكن دة عمل في الأول مشاكل، لكن نقطة كولر في الاهتمام بالتفاصيل كان مرعب جدا جدا”.