خالد الجوادي: كولر صبر كتير على أحمد عبد القادر.. واللاعب دخل في سكة المظلومية

كشف خالد الجوادي مرتجم السويسري مارسيل كولر المدير الفني السابق للنادي الأهلي، عن التفاصيل الخاصة بأزمة أحمد عبد القادر، مع مارسيل كولر.

أزمة أحمد عبد القادر مع مارسيل كولر

أكد خالد الجوادي: “كولر كان شايف في أحمد عبدالقادر إمكانيات مختلفة، وكولر كان بيشتغل معاه على فكرة أنك لعيب كبير وعندك موهبة بس اللي عايزه منك تتمرن كويس والقرار”.

وتابع عبر بودكاست الغيجيبشين ليج: “مشكلة كولر مع عبدالقادر في القرار، قراره في الملعب، عندك مهارة عديت خد قرار ومتكترش، وبعدها قال له بعد ما تعدي خلي أول قرار الشوط ومتخافش وأنا هحميك في المؤتمرات وهقول إني اللي قايلك تعدي واحد على واحد”.

وواصل: “فعلا كان بينفذ الكلام ده ويتألق فيحس أنه نجم، فيرجع تاني يكتر في الترقيص فكولر يتكلم تاني، ويعيد الكلام وبقينا بنلف في الدايرة دي، وكولر صبر عليه جدا لأنه كان مؤمن بإمكانياته”.

تصريحات خالد الجوادي

وأضاف: “لكن لما كولر لقى أنه مبيسمعش التعليمات، قال استعمل أساليب تانية وبدأ يركنه، فبعد ما يتركن يرجع ينفذ التعليمات، يلعب ماتشيين تلاتة ويرجع تاني يكتر في الكورة، فكولر يقول المرادي مش هقعدك دكة أنا هخرجك برا الاسكور خالص عشان عايز يقومه”.

وزاد: “بدأ أحمد يدخل في سكة إحساس بالمظلومية، وصلته أنه زق إيده بعد ماتش من الماتشات، بس بعدها اعتذر له وعبدالقادر قال له أنا أهلي قالولي ده الراجل اللي لعبك واللي بيدافع عنك في الإعلام تعمل معاه كده فاعتذره وباس دماغه”.

وذكر: “كولر قال لي يومها أنا عمري ما هشخصن حاجة المهم مصلحة الفرقة، والحاجات دي بتحصل في الكورة وهو اعتذر والموضوع خلص”.

واختتم: “بعدها رجعنا لنفس الدايرة تاني وعبدالقادر دخل في سكة المظلومية، واللاعب لو دخل السكة دي عمره ما هيتحسن عشان دايما عنده حجة لسوء مستواه”.