أنا نمبر وان وحسن شاكوش بيكرهني ..تصريحات مثيرة للمطرب عنبة خلال لقاءه مع الإعلامية أميرة بدر

 تصدر الفنان مصطفى عنبة تريند محركات البحث جوجل بعد حلوله ضيفا أمس على برنامج "أسرار" المذاع على شاشة قناة "النهار" مع الإعلامية أميرة بدر، حيث كشف عن العديد من التصريحات الهامة وبعض الجوانب الشخصية والفنية في حياته.

وسنرصد لكم من خلال ذلك التقرير أبرز تصريحات عنبة كما يأتي:-

كشف عنبه عن قصة احترافه لكرة القدم وإجراءه بعض الاختبارات في النادي الأهلي، وقال: "أنا كنت لعيب كرة قدم ودخلت اختبارات النادي الأهلي، ونجحت في الاختبار الأول والثاني، وفي الاختبار الثالث المدرب كان عارف والدي وقال ابن فلان مبروك".

تابع عنبة: "لما المدرب قال ابن فلان مشيت وقررت إن الكرة مش هتبقى هواية في حياتي، لأن أنا مش عايز أنجح في حاجة فيها واسطة".

أما عن حبه لـ نادي الزمالك، علق عنبة قائلا: "الزمالك قصته شبهي، بيعاني وعليه هجوم كبير من طوب الأرض، لكن دايما بيحاول".

معاناة عنبة في فترة الدراسة رغم تفوقه 

أشار عنبة إلى المعاناة التي عاشها في فترة دراسته، وأنه رغم تفوقه وحصوله في مرحلة الإعدادية على مجموع 96%، إلا أنه لم يدخل ثانوي عام، وقال: "كنت عارف ظروف أهلي وقلت أدخل صنايع والمدرسين كانوا بيطردوني من الصنايع علشان مجموعي".

استكمل عنبة حديثه عن فترة الدراسة، وعلق: "دخلت مدرسة سياحة وفنادق علشان أقدم فيها، ولكنها كانت بتاخد بكشف الهيئة، وكان في واحدة مسؤولة عن الاختبارات هناك وقالت لي إنت شكلك كويس لكن محتاج قميص وبنطلون وجزمة".

قال عنبة: “مكانش معايا أي فلوس وقتها علشان أقدر أجيب جزمة وهى ساعدتني، ومش عارف اسمها إيه لكن عمري ما هنسى جميلها وإنها وقفت معايا، ونفسي أعوضها عن كل حاجة عملتها ليا”.

عنبة: محدش بيلعب في حتتي أنا نمبر وان 

وأكد عنبة أنه يصنع مزيكا مختلفة تميزه عن غيره، وقال معلقا: "أنا بعمل مزيكا مختلفة وبنافس نفسي وبحاول أطور منها اكتر وبغير من نفسي وعايز أبقى أحسن دايما، ومحدش بيلعب في حتتي لأن أنا نمبر وان في المنطقة بتاعتي ومنطقتي بين الراب والمهرجانات".

وعن الصراعات التي يعيشها في الوسط الفني، قال عنبة: "معنديش أي صراعات في الوسط الفني، لكن في ناس بتكرهني زي حسن شاكوش وعمري ما اضايقت منه في عز نجاحه".

وأضاف عنبة: "مش بسلم على حسن شاكوش علشان كل أما أقابل حد يقولي شاكوش بيتكلم عليك بشكل وحش، وهو مضايق من أغنية "مش شايف فيكم حد"، وفاكر إني أقصده هو، ومسلم الناس دايما تقول لي إنه بيكرهني".