مش هسيب حقي.. طارق الشناوي يعلن مقاضاة مصطفى قمر بعد هجومه عليه

تصدرت أزمة الناقد الفني الكبير طارق الشناوي والفنان مصطفى قمر مؤشرات البحث جوجل في الأيام الأخيرة، بعد تعليق الشناوي، على فيلم "أولادر حريم كريم"، الذي عرض مؤخرًا، ووصفه بالفشل، مشيرًا إلى أن مصطفى قمر في مرحلة الانحدار الفني.

وبعد تصاعد الأزمة ورد مصطفى قمر على تعليقه، أعلن طارق الشناوي، مقاضاته بعد التطاول عليه خلال العديد من اللقاءات التلفزيونية، وقال لـet بالعربي: اللي حصل من مصطفى قمر سب وقذف علني، واللي هياخد اجراء ضده مش أنا دي نقابة الصحفيين لأنها جزء من المنظومة وبتحافظ على حرية التعبير.

طارق الشناوي يقاضي مصطفى قمر

وأضاف: هتخذ إجراءات قانونية وبنصح الناس متقولش هجوم لإني مهاجمتوش أنا انتقدت الفيلم واتشمت وهاخد حقي مش هسيبه حتى لو اعتذر، لإن اللي عمله يدينه قدام الرأي العام ويؤدي لدخوله السجن لازم يتعاقب ومفيش مبرر للي عمله.

وواصل: ليه بتقول يا مصطفى إني مشوفتش الفيلم هو مش معايا 24 ساعة ده من ضمن الأسلحة الفاسدة وهرد عليه واقوله هل أنت شوفتني اتفرجت على الفيلم ولا لا يعني لو قولت رأي إيجابي هيتقال إني شوفت الفيلم أنا مش هسيب حقي.

مصطفى قمر يهاجم طارق الشناوي

وكان قد هاجم مصطفى قمر الشناوي وقال عبر حسابه الشخصي بموقع التواصل الاجتماعي فيسبوك: أنا مش طلبت منك تبعد عني أصلًا وماتتكلمش عني علشان ماتتهزأش طيب أنت اللي جيبته لنفسك عموما ياللي اسمك طارق أنت كاتب كلام أهبل يدل للمرة المليون أنك ماشفتش الفيلم.