خلال ندوة صحفية بموقع بصراحة| محمد هاني يكشف تفاصيل نشأة برنامج «الستات مايعرفوش يكدبوا»

تحدث الكاتب الصحفي الكبير محمد هاني، عن تفاصيل نشأة برنامج "الستات مابيعرفوش يكدبوا"، مشيرًا إلى أن فكرته كانت في وقت صعب للغاية بسبب الثورات.

وقال محمد هاني خلال ندوة خاصة بموقع بصراحة الاخباري: "كنت متفق نعمل برنامج اجتماعي نسائي يبقى موجود في منتصف اليوم، فتناقشنا وحطينا عدة مقترحات، وكنا وقتها في حتة صعبة في مصر الناس عايزة تتابع المظاهرات وكده، فكان صعب تعمل حاجة اجتماعية نسائية مش هتلاقي ليها جمهور أصلًا".

وأضاف: "فكرت وقتها نحط تركبية عشان نشوف برنامج زي ده هيبقى عامل ازاي اجتماعيًا، فكرت في أميرة الدين وهي محامية وناشطة حقوقية وليها فكر ورأي وبتشتبك وأديبة، ومنى عبد الغني اللي تعتبر نموذج لستات كتيرة وهي فنانة في نفس الوقت وبتغني ومعندهاش انحياز لحد، ومفيدة شيحة إعلامية عندها شقاوة طبيعية ودمها خفيف، وهي الوحيدة اللي عندها مهارات تلفزيونية وبنت ماسبيرو، فكرت في الثلاثي ده".

وواصل: "اتفقنا معاهم وأخترت الاسم بس يعني اي الستات مابيعرفوش يكدبوا اسم جميل والناس هتستغربه، وأنا أخترت أسامي برامج كتير زي معكم، ومنى وقتها عجبها الاسم برضوه".

وتابع: "بنلاحظ أن في برامج كتير بيقولوا برنامج فلان، مش بيقولوا اسم البرنامج، لكن من البرامج اللي معروفة بالاسم "الستات مابيعرفوش يكدبوا"، "البيت بيتك".

ويعد الكاتب الصحفى والإعلامى محمد هانى واحد من صناع الإعلام فى مصر والعالم العربى ، حيث ترأس عدد كبير من البرامج التليفزيونية أبرزها برنامج البيت بيتك ، كما أسس وتولى إدارة قناة cbc ، ونجح خلال تواجده فى تحقيق انتشار واسع ونجاح.