ياسمين عز: قبل ماتش الأهلي والزمالك جوزك بيبقى سرحان في كهربا مش بواحدة غيرك

علقت الإعلامية ياسمين عز، على مباراة القمة التي تجمع بين الأهلي والزمالك في الدوري الممتاز، غدًا السبت، مقدمة بعض النصائح للزوجات للتعامل مع أزواجهن خلال المباراة.

وقالت «عز» في تعليق عبر برنامجها «كلام الناس»، والذي يعرض عبر قناة «إم بي سي مصر»، اليوم الجمعة: «الماتشات اللي من النوع ده بيكون لها طقوس خاصة في البيت، الأجواء بتكون مكهربة، لو اتصلتي بخطيبك ومردش عليكي، متزعليش منه، لأنه بيكون في دنيا غير الدنيا».

تصريحات ياسمين عز

وأضافت: «لو جوز معرفش ينام النهارده وسرحان، ما تستغربيش مش عشان عنده أرق أو بيفكر في واحدة غيرك، وهو بيفكر في نتيجة ماتش بكره وبيسأل نفسه أسئلة كتيرة، زي يا ترى كهربا هيبدأ أساسي بكرة ولا لأ؟ جدو فيريرا هيبدأ بـ عبدالشافي ولا عمر جابر ناحية الشمال؟ محمد شريف هيرجع مخيف ولا لسه مش في الفورمة؟ هل سامسون ممكن تكون بدايته الحقيقية في الماتش ده ولا هيحصّل زكريا الوردي، وقائمة من الأسئلة الكتيرة، أنتي لا تعلمي شيء عن الصراع اللي في دماغه».

وتابعت: «من فضلك حاولي تتفادي جوزك خلال اليومين دول، وبلاش تصدري له مشاكل أو تطلبي منه طلبات ملهاش لازمة اليومين دول بالذات».

وأكملت «عز»: «لو فريقه خسر، متبقيش إنتي والزمن وأصحابه اللي بيحفلوا عليه، اوعى تقربي منه على الأقل 3 أيام، ولو فريقه كسب، يا سعدك يا هناكي هتلاقيه اتحول للعفريت اللي في مصباح علاء الدين، اطلبي واتمني زي ما انتي عايزه».