روحي صلي عند الحمامات.. سيده تشكو من مطعم شهير لمنعها من الصلاة

خلال الساعات الماضية تداول السوشيال ميديا منشور لـ عميلة كانت في مطعم شهير فرع مول العرب، وكانت تحكي موقف غير أخلاقي حدث من مدير المطعم.

وشرحت الفتاة الموقف، قائلة: عمري ما كنت اتخيل إن ييجي يوم اللي اطرد من مكان ويتقالنا: إنتو غير مرغوب فيكوا هنا، النهارده كنت في فرع مول العرب مع جروب من إصحابي، وكان معانا أمهات وأطفال.

وتابعت: إحنا للاسف كنا متأخرين في صلاة الظهر، وكان اذان العصر خلاص هيأذن، فكان لازم نلحق نصلي الظهر، صحبتي قامت تسأل عن مكان تصلي فيه دخلت في مكان بعيد كده واحد قال لاء هنا مش هينفع عشان ممر ومدخل للمطبخ،قالتله خلاص هصلي هناك وبعيد عن أي عميل

واصلت: فجأة، فوجئنا بمدير الفرع بيجري عليها وهو بيحاول يوقفها ويمنعها تكمل صلاتها، أنا اتدخلت بهدوء وحاولت أفهم منه إيه المشكله وافهمه الموقف، وإننا عملاء في المطعم، وصاحبتي بتصلي بعيد عشان مضايقش حد ، وطلبت منه يوضح اللي هو عايزة ويعمل شغله بإحترام وهدوء من غير تجاوز، وانه لو عايز ممكن يطلب منها بلاش تصلي هنا بإسلوب محترم.

واستكملت: ومن اللحظة ديه ساب صاحبتي، وابتدى يوجه كلامه كله ليا انا بتطاول شديد، وفي اول دقيقه قضلت اقوله أكتر من مره:لوسمحت وطي صوتك.. ما ينفعش تكلمني بالطريقه دي خالص،كل ده وأنا حريصة إن المضوع يخلص بهدوء، لكن هو اللي صعد الموقف.

أوضحت: ابتدي يعلي صوته، ويشاور بإيده بعصبية، ويتجاوز في الكلام قدام كل الناس،وقال:روحي صلي عند الحمامات(أنا متفهمهة إنه أكيد يقصد المصلى لكن هو قال كدة لفظاً)ماتمشيلكوا خطوتين زيادة لربنا زي ما بتروحوا للـ toilet

تابعت: حولت اوضحله إن أحنا موجودين كعملاء في المطعم أيان كان حتى لو الفرح موجود في المول، وإن طول ما الصلاة في مكان بعيد عن الناس ومش مضايقه أي حد يبقا مفيش مبرر للي بيحصل، خصوصاً ان مكنش في مصلى قريب وهي بتلحق الصلاة خلاص، وهل لو كنا في فرع تاني مش في المول هتطردني اصلي في الشارع؟ ..لكن كان رده: صلي عند ربنا.. مش عندي، وكمل: اتفضلوا اطلعوا برا إنتوا غير مرغوب فيكوا هنا، وطلب الأمن علشان يخرجني من المطعم.

واستكملت: ساعتها لفيت لكل الناس اللي كانوا قاعدين و سألتهم يصوت واضح: في حد هنا مضايق او متضرر من إن صاحبتي كانت لتصلي على جمب؟ و ردوا: لأ.. براحتها إحنا في بلد مسلمة، ومن حقها تصلي في إي مكان من غير متضايق حد.. واللي حصل بعد كده كان بالنسبالي مفاجأة.

العملاء الموجودين وقفوا معانا، وشهدوا قدام الأمن إننا ما عملناش أي حاجه غلط.

وللاسف، وهو بيتكلم، ابتدى يتجاوز حتى مع الناس اللي كانت بتحاول توقفة عند حده.

واسترسلت: وعدد من العملاء سابوا المطعم اعتراضاً على اللي حصل، واكتر من شخص قال إنه هيقاطع المطعم بسبب الموقف ده،وكذا شخص صور اللي حصل، وعرفت بعد كده إن في ناس من العملاء قدموا شكاوي رسمية لإدارة المول ضد مدير المطعم.. ورغم كل ده، كان كل اللي بيردده: دي سياسة المكان.

واختتمت: طلبت في مقابل كل اللي حصل: مرفضناش ندفع الحساب، وكنت منتظره حد من إدارة المطعم يدخل ويعتذر لكن ده محصلش، وفي المقابل أحب اشكر إدارة مول العرب لأنها كانت الجهة الوحيدة اللى تدخلت بسرعة، وحاولت تحتوي الموقف، وهما أكدوا إنه هيتم إتخاذ الإجراءات اللأزمة من ناحيتهم وإن التطاول ده غير مقبول بالنسبه لهم.