زوجة محمود حجازي لـ «بصراحة»: أنا عمري ما طلبت منه يشيل منع السفر

ردت رنا طارق زوجة الفنان محمود حجازي على الاتهامات التي وجّهت لها من زوجها بأنها تمنعه من ابنهما وتريد أن تسافر معه خارج البلاد.

وقال رنا طارق في تصريح لـ بصراحة: و بيقول إن مهما حصل مش هيشيل منع السفر، أنا عمري ما طلبت منه يشيل منع السفر، واللي متمنّع من السفر أصلا ابنه،  ابنه ده مش عايش معاه، ولا هو مسؤول عنه، ولا بيسأل عليه، ولا بيصرف عليه، وبقالّي 5 شهور عايشة مع ابني في مكان تاني في مصر، بصرف على نفسي وبصرف على ابني لوحدي.

وأضافت: لو كنت عايزاه يشيل منع السفر، كنت أخدت الديل اللي عرضه عليّ من كام شهر لما طلب مني فلوس مقابل إنه يشيله، وأنا كنت ممكن أدفع له الفلوس دي، ما أنا ياما صرفتـ أنا قاعدة في مصر علشان قضية الضرب بتاعتي، علشان آخد حقي بعد ما إدّاني علقة موت لما واجهته بالعلاقات النسائية، وعندي جلسة يوم 21 فبراير.

وتابعت: أنا جيت مصر بإرادتي وجبت له ابنه، وأنا متحمّلة كل المصاريف علشان يشوف ابنه، وعلشان أهله يشوفوه.
هو نفسه كان عاملي بلوك وأنا في أمريكا، ومبيسألش على ابنه، ده حتى أنا عاملاله فيزا لأمريكا بـ 5 سنين، وهو مجاش يشوف ابنه، وبرغم كده جبتهوله على أمل إنه يفوق ويتغيّر".

واختتمت: ولما وصلت مصر اكتشفت مصايب: علاقات نسائية، ولايفات على التيك توك بالساعة، وحاجات مشبوهة، ولما واجهته بعلاقاته النسائية المتكررة وطلبت الطلاق، اعتدى عليّا وكنت هموت، وأنا وقّفت إجراءات الجنسية ليه لما اكتشفت العلاقات دي، وده ضايقه أكتر مني، وأنا رافعة عليه قضية طلاق، علشان برضه لما طلبت الطلاق، طلب مني فلوس بالدولار، فبرضه قاعدة في مصر علشان القضية دي كمان.
رد الفنان محمود حجازي على الاتهامات التي واجهت إليه بشأن التعدي على زوجته وفتاة أجنبية.

ووفي وقت سابق، كان محمود حجازي قد كتب عبر  حسابه الشخصي بموقع التواصل الاجتماعي "إنستجرام" وقال: "إحنا منعرفش الخير فين وليه بيحصل كل ده؟ أكيد ربنا ليه حكمة والحقيقة هتبان هتبان، وساعتها هبقى ضامن حقي في الدنيا زي ما ضامن حقي في الآخرة".

وأضاف: "كفاية كذب، ده أنتوا حتى بتكذبوا في الشهادة العلمية وبتقولوا دكاترة، فين طيب الدكتوراه دي؟ وهي كذبة بتحاولوا تداروا بيها عن نقصكم. أنتم فاضيين ولا تعملوا غير على أذيتي وكل من حولي".

وتابع: "مهما عملتوا مش هنتنازل عن منع_سفر ابني اللي أنا محروم منه، ولحد دلوقتي أبويا وأمي لسه ماشافوهوش خالص من ساعة ما اتولد وبقي عنده سنة ونص، وبقاله في مصر ٥ شهور. ربنا موجود وأنا أقوى من أي حاجة عشان معايا الحق، ومهما صرفتوا من حملات عشان تدمروني مش هتعرفوا، ده تعب سنين، ولو عايزين تتشهروا اصبروا، لسه اللي جاي هيشهركوا أكتر، رغم إني كنت ساكت عشان خاطر ابني، بس دلوقتي خلاص لازم الدنيا كلها تعرف حقيقتكم زي ما ربنا عارفها. إني فوضت أمري لله".

واختتم: "وبجد اللي حصل ده علمني كتير أوي، وشكراً لكل حد سأل عليا أو قال كلمة خير في حقي.. ولكل حد بيتكلم عن الموضوع وكأنه عايش معانا وبياكد اتهامات من غير دليل. حسبنا الله ونعم الوكيل، لقاؤنا قدام ربنا، أنا واثق في ربنا والقضاء المصري وحقي هيرجع بالقانون".