لايف بصراحة| نجل ضحية أسانسير مستشفى شبرامنت: عايز حق أمي

قال إبن ضحية مستشفى شبرامنت المركزي والتي لفظت أنفاسها الأخيرة جراء حادث الأسانسير داخل المستشفى:" مدير المستشفى، قالي العملية هتتكلف 35 ألف جنيه، وجهزت له الفلوس واديتهاله، تاني يوم رجعلي 25 ألف جنيه وقالي دول هياخدهم مسئول الشركة اللي هتورد المفصل، ومعايا ايصالات بكل الحاجات دي".
 

وتابع نجل ضحية أسانسير مستشفى شبرامنت، في لايف خاص لموقع “بصراحة” الإخباري:" أمي دخلت العملية فعلا الساعة 9 ونصف وعملتها وخرجت منها الساعة 12 الظهر كانت تمام و زي الفل، بعدها دخلنا الأوضة بتاعتها  لأن من شدة العملية خدت حقنة مسكنة ومحدش سأل فينا تاني ولا حد عبرنا.

وأضاف:" قولت لأحد العاملين فى المستشفي أمي محتاجة تغير هدومها قالولنا هتنزل تعمل أشعة في الدور الأرضي روحنا عند الأسانسير قالولنا عطلان وهنبعتلك وبعد  نص ساعة قالولنا الأساسنير إشتغل وعايزين حد ينزل الحالة، ونزلت على السلم انا واخويا وإبن خالي بنت خالتي دخلوا الأسانسير معاها، واستنينا تحت وساعتها نزل الأسانسير ومفيش ثواني ولقيناه بيطلع لفوق لوحده".

إبن ضحية مستشفى شبرامنت: أول ما طلعوا الترولي لقينها اتزنقت في السقف 

واستكمل:" أول ما طلعوا الترولي لقينها اتزنقت في السقف ما بين الأسانسير والحيطة بتاعت الدور الأرضي، الدم بقي مليان فى كل حته ونطقت الشهادة بعدها وماتت في ساعتها".

وتابع:" أمي قعدت تلت ساعة فى الأساسنير مش عارفين يعملوا حاجة، ريحة الشياط بقت منتشرة فى كل حته،وسوسته الأساسنير اتقطعت والكهرباء فصلت، وأرضية الأوضة اتكسرت كلها ومعانا صور بكل الحاجات دي".

نجل ضحية أسانسير مستشفى شبرامنت: عايز حق أمي

واختتم:" ماحدش سأل فينا قعدنا نصرخ لحد ما الأمن جه ولحقنا وخدوها ودوها أوضة الرعاية كانت الرقبة مكسورة وخلصانة، أنا عايز حق أمي من أي حد مسئول عن الإهمال اللي حصل في المستشفى واللي اتسبب في اللي حصل لأمي ده.