رفض شرب المخدرات تحت نافذة بيته فكان هذا مصيره .. الحاج ياسر يروي تفاصيل الاعتداء عليه وعلى ابنه ضربًا | لايف بصراحة

روى الحاج ياسر  المقيم بمحافظة الإسماعيلية عن تفاصيل الواقعة التي تعرض لها هو وابنه المقيم بالعناية المركزة لوقتنا الحالي، قائلًا: هم قاعدين بقالهم سنتين في العمارة اللي قدامنا، وبيتاجروا في جميع أنواع المخدرات، وبيجوا يشربوا تحت البيت، ونبهنا عليهم أكثر من مرة واتنين وثلاثة وعشرة بالحسنى، وناس قالولهم عيب اللي انتوا بتعملوه مفيش فايدة، ولدرجة أنهم قالولي اقفل الشباك او امشي من هنا لو مش عاجبك. 

بيشربوا مخدرات تحت شباكي ولما اعترضت ضربوني أن وابني

وأكد الحاج ياسر خلال لايف بصراحة الإخباري أن هذه الواقعة قد تمت يوم 7 يوليو الموافق الأحد في تمام الساعة ال8، موضحًا لتفاصيل الواقعة: جم يتخانقوا، فقولنا ليهم اللي بتعملوه ده غلط ومش غلط، فقعدوا يقولوا كلام مالوش لازمة، و يشتموا، وشتموا المدام كمان، وابني كان رايح فرح في الإسماعيلية، وابني اتضايق، وقولتله يا ابني مالناش دعوه بحد أكيد بيشتموا حد تاني، فروحنا نعاتب أم الشاب اللي بيشرب مخدرات، فلاقيناهم بيشتموا فينا، وبعد كده ضربونا بالأيد، واحنا كنا بندافع عن نفسنا، فلاقيتناهم جايبيين شومة، والناس فضلت تهدي فينا لحد ما قعدنا والموضع هدي، فبصينا لقينا أخت الشاب جابت شومة وبتنكش بيها ابني وخبطته بيها في دماغه. 

الحاج ياسر: ابني في العناية المركزة وقطعولي كوعي وصباعي

وتابع: وابني لما اتخبط بالشومة في دماغه، وبعدين كنت أنا واخويا وابني، والبنت جابت شوال فيه سمك وفضلت توزع على مجموعة من الشباب، وفضلوا نازلين فينا ضرب لحد ما اتصابنا، ولقيت حد جاب سيف قطعلي كوعي، واتخيطت في صباع ايدي 10 غرز، وكوعي واخد اكثر من 40 غرزة، وركبت فيها شرايح ومسامير، مستنكرًا: طب ليه كل ده عشان بنقولك انقل الناحية التانية. 

وأضاف: احنا عندنا توكتوك ابني بيشتغل عليه بعد ما يرجع من الشغل، كسروا التوكتوك على ابني وحصل شرخ، واتنقل للعناية المركزة في مستشفى فايد، وعملوله عملية، والله يباركلهم مركز طبي فايد، لأنهم مأثروش معانا في حاجة. 

وتابع: ولما حصل كده الحكومة جت طلعت شقتهم كسروا كل حاجة فيها، والبنت نادت على أخوها وأمها قبل ما الحكومة تيجي عشان يلموا الكراتين اللي فيها مخدرات ويهربوا بيها قبل ما يجوا، ولكن الحمد لله الحكومة قبضت على أخوها. 

الحكومة تبذل جهدها على أكمل وجه

والحكومة كتر خيرها حاجزة على الشاب ده، و الحكومة مش ساكتة، بس أنا ابني بين الحياة والموت استفدت ايه، مستنكرًا: كل ده يحصل عشان بقول قوموا من تحت الشباك متشربش هنا!

 وأكد الحاج ياسر، على أن الحكومة قد قامت بدورها على أكمل وجه، ولم تقصر معهم، قائلًا: بس الحكومة مش ساكتة وظباط المباحث ربنا يباركلهم.

لا ضرر ولا ضرار

ونوه ياسر عن أن التدخين الذي كانوا يتعرضوا له من أثار المخدرات التي كانوا يشربوها جيرانهم تحت نافذتهم، أدى إلى ظهور نسبة من الشكلوك عندما قال لهم الطبيب انهم يتعاطون المخدرات، وهذا كله بسبب المخدرات التي يتعرضون لها بشكل مستمر من جيران السوء. 

وقال: احنا كل اللي كنا بنقوله انقل الناحية التانية، فلا ضرر ولا ضرار، مستنكرًا: فأنت استفدت ايه وأنا استفدت ايه، انت استفدت انك اتحبست وانا استفدت أني متعور أنا و ابني، مين يجبلنا حقنا بقى، أنا مبقتش اتحرك، و أنا راجل أرزقي وبشتغل في شركة إذا استحملوني النهاردة مش هيستحملوني بكرة.