هجوم ومظلومية وخلافه مع كولر.. تصريحات مثيرة وجريئة من أفشة في الكورة مع فايق

كشف محمد مجدي أفشة لاعب النادي الأهلي، حقيقة أزمته مع المدير الفني السويسري مارسيل كولر وتغريمه ماليا إثر انفعاله على المدرب.

وقال أفشة خلال لقائه مع الإعلامي إبراهيم فايق بقناة إم بي سي مصر 2: "فيه ناس طلعت تقول إني عملت مشكلة مع كولر وخدت شنطتي ومشيت.. مستحيل أعمل كده في الأهلي.. وعمري ما أبيع الأهلي أي حد يتمنى يبقى في الأهلي.. الأهلي هو اللي بيصنع أي نجم".

حقيقة تغريم النادي الأهلي لـ أفشة

وأكد أنه لم يتم تغريمه ماليا في النادي الأهلي بسبب ما يشاع عن أزمته مع كولر والأمر لم يتعدَ فكرة التواصل مع المدير والاستفسار منه عن بعض الأمور الفنية.

95 % من الجماهير المصرية لا تفهم شيئا عن مجريات الكرة
 

ولفت أفشة إلى أن 95 % من الجماهير المصرية لا تفهم شيئا عن مجريات الكرة داخل الملعب سواء فيما يتعلق بالأمور الفنية أو التكتيكية أو ما يجرى داخل غرف الملابس أو أفكار المدرب.

جائزة أفضل لاعب في مباراة نهائي كأس مصر

وأشار إلى أنه يعاني من الظلم في كثير من الأمور وعدم حصوله على حقوقه إعلاميا أو عبر السوشيال ميديا، لافتا إلى أنه كان يستحق جائزة أفضل لاعب في مباراة نهائي كأس مصر التي أقيمت في السعودية وانتهت بفوز الأحمر بهدفين نظيفين أمام الزمالك، لأنه أحرز هدفا وصنع لإمام عاشور هدفا، مؤكدًا أنه أفضل لاعب في مصر هذا العام بالأرقام مع تقديره لكافة اللاعبين.

أفشة: هدف القاضية الأغلى في حياتي 

وأشار إلى أن هدف "القاضية ممكن" الأغلى في حياته لأنه جاء في نهائي القرن أمام الزمالك، لافتا إلى أن سعد سمير أبلغ اللاعبين أنه في حال الخسارة سيتدربون بعد المباراة أونلاين لصعوبة الظروف بعد الخسارة.

وتابع: "أنا فاكر كل تفاصيل أسبوع مباراة نهائي القرن، ودي أعظم حاجة ربنا إدهالي، السولية قال أنا عايز أعيط من الفرحة، وعمري ما هنسى الكلمتين دول، السولية لما لعبها طويلة أنا توقعت إن هيبقى فيه كورة تانية هتيجي".

وواصل: "القاضية أعظم هدف وأعظم بطولة، لكن ارتباط اسمي بالقاضية ساعات بيظلمني، مش ده الجون اللي أنا جايبه بس ولا دي الحاجة الوحيدة اللي أنا عملتها، عندي أهداف مهمة في الدوري والكأس وأفريقيا وكأس العالم للأندية وكسبت 15 بطولة مع الأهلي".

أفشة: لا بحر ولا بسين الطرومبة هي البروتين

وعن ظهوره في الأرض الزراعية مع والدته أمام الطلمبة علق: "ولا بحر ولا بسين الطرومبة هي البروتين.. ده يوم حلو في البلد، كنت بتمرن عندنا في ملعب خماسي، والدي كان عنده لعب هو وأخويا ولعبت معاهم، والدتي كانت رايحة الأرض هي والبنات الصغيرة، فقولت أروح معاهم أساعدهم بقى".

أفشة: صلاح بعد النيولوك بقى شبهي أوي

وعن نيولوك محمد صلاح الجديد علق أفشة ساخرا: "صلاح بعد النيولوك الجديد بقى شبهي أوي بس شكله بقى حلو ولايق عليه".

ولفت: "بحب ألعب جنب إمام عاشور وكهربا والسولية ومعلول.. إمام عاشور من أكتر اللعيبة اللي بحب ألعب معاها جدًا، ومنعم لعيب كبير، وأتمنى استمرار معلول".

أفشة: موسيماني مدرب كبير وراجل عالي أوي فنيًا

وأوضح: "موسيماني مدرب كبير، وراجل عالي أوي فنيًا، بس كان مركز وبيميل لـ 15 لاعبا فقط.. مفيش حد زي فايلر، كورته وشخصيته وتمرينه وكلامه كل حاجة كان بيعملها حلوة وبيوصلك يعني إيه كورة بمنتهى السهولة، التمرين بتاعه كان كورة سريعة دايمًا كنا بنكسب كل الماتشات معاه في الدوري تلاتة وأربعة".