جميلة عزيز: خطيبي تركني لما جالي مرض.. ومش همثل غير بالحجاب |خاص

أعربت الفنانة جميلة عزيز عن استيائها الشديد من ترك صديقتها له وخطيبها خلال مرورها بوعكة صحية، مشيرة إلى أنها تعتبر صديقتها توفت، بسبب بعدها عنها في وقت محنتها الصعبة التي مرت بها.

وقالت جميلة عزيز خلال ندوتها بموقع "بصراحة": صديقتي المقربة سابتني في وقت مرضي ومسألتش عندي واعتبرتها أنها توفت وكل ما حد يسألني عليا بعدها أقولهم دي الله يرحمها، وهى من الوسط الفني مش خارجه بس مش هقول اسمها لأي حد الله يسامحها مش هتكلم عليها تاني بعد اللي عملته فيا في وقت محنتي.

أزمة جميلة عزيز الصحية

وأضافت: نقابة المهن التمثيلية برئاسة الدكتور أشرف زكي مسابونيش لحظة وكان كل يوم يتصل بيا، ويقولي مش هسيبك يا جميلة مهما حصل أنت بنتنا وبنت الفن، وكان كل ما أكتب حاجة على صفحتي على فيسبوك الاقي كل أعضاء النقابة وزمايلي يكلموني يقولولي طب أنت فيكي حاجة ايه اللي حصلك، ويتصلوا بيا ويجولي البيت كانوا دول بصراحة هما اللي بيسألوا عليا أما أقرب الناس ليا تركتني في عز مرضي.

وتابعت: أنا كنت بين أيد ربنا في وقت مرضي، كنت تعبانة جامد وخطيبي سابني لما عرف إصابتي بالمرض الخبيث اللي جالي، وكانت صدمة كبيرة أوي بالنسبالي، لكن إيماني بربنا رجعنا للحياة من تاني، وقررت وقتها البس الحجاب، ومش هخلعه تاني أبدا حد لو جالي دور كبير أقدمه، أنا في الفترة اللي غيبت فيها قررت أقرب من ربنا وبركز في صلاوتي وبعتكف في رمضان وطول الوقت بقرأ قرآن

خطيبها

وأختتمت عزيز قائلة: اللي مريت بيه مش قليل أنا عديت بمراحل صعبة كتيرة لكن ربنا كرمني وقدرت أرجع لما قربت منه، وبحاول دلوقتي أشارك في الأعمال اللي تليق بتاريخي الفني ومتكنش معارضة للحجاب ولا يوجد فيها تلامس نهائي.