درة: الفنانين مش بيردوا على مهاجمة السوشيال ميديا لأنهم بيترفعوا عن الجدال

حلت الفنانة درة ضيفة على برنامج "في البوكس" الذي يعرض على موقع التواصل الاجتماعي “فيسبوك"، وكشفت الفنانة درة العديد من الأسرار عن حياتها الشخصية لأول مرة بجانب الحديث عن الزواج.

وقالت درة: الجواز مينفعش يكون هدف حياة البنت ولو معملتش دا يبقى محققتش حاجة، بالعكس ممكن السنجل تكون مبسوطة وأنا عملت أغنية من زمان مع أبلة فاهيتا عشان أقول كدا، ومش لازم البنت تتجوز عشان تفرحوا بيها وممكن تفرحوا بنجاحها ودراستها.

وتابعت درة: أنا مكنتش رافضة الزواج أبدا، ولكني شخصية مترددة في كل شيء حتى في شغلي كمان حتى بعد ما آخد القرار ممكن أغير رأيي، أما عن إمكانية دخولها عالم الغناء، علقت درة، قائلة: أنا بحب المزيكا جدا والغناء ولكني مش مطربة.

وأضافت: أنا بيحصلي حاجات كتير ومعرفش سببها يمكن قدر مش شرط حسد، وأنا معنديش كل حاجة عشان أتحسد وزي كل الناس مفيش سبب يخلي حد يحسدني.

واختتمت: أنا نفسي أثق في نفسي أكتر ولكن الناس بتفتكر إني مغرورة، ودا سببه إني بتكسف وفي حالي وبتكسف أكلم حد وأي حد يعرفني في الحقيقة بيعرف إني مش مغرورة أبدا، وخجولة جدا وعمري ما بشتم ولا بضرب ولا باخد حقي وبيكون نفسي آخد حقي لأني أكيد هقدر، وبقول لكل اللي بيهاجمونا على السوشيال ميديا وبيستحلوا الكلام عننا إن الفنانين مش بيردوا لأنهم بيترفعوا عن الجدال وبيتجاهلوا إنما مش معناه إنهم مش عارفين يردوا.