مصطفي يونس لـ «بصراحة»: «أحنا النادي الأوحد في مصر.. ولو كولر كان ضغط على الزمالك كان كسب 8»

تحدث مصطفي يونس لاعب النادي الأهلي و منتخب مصر السابق، في تصريحاته لموقع «بصراحة » عن فوز الأهلي الكبير علي نظيره الزمالك والتي أنتهت برباعية مقابل هدف، في المباراة التي جمعتهما على ستاد القاهرة الدولي، ضمن مباريات الدوري الممتاز .

وعند سواله عن لقاء القمة 126 قال: «المفروض الأهلي كان كسب كتير، لاعبي الفريق كانت بتهزر، أن 4 أهداف قليلين جدًا».
وأضاف : «لو كولر كان ضغط الشوط التاني، كنا ممكن نكسب 8 مثلا».
وأكد يونس :«أحنا النادي الأوحد في مصر، ومتنساش أن الأهلي خسر الدوري مرتين وراه بعض ».
وأبدي يونس سعادته بأداء الفريق الأحمر في الفترة الأخيرة وأردف: «الخواجة كولر عجبني جدا، تاو لو كان فايق هو وديانج وكهربا كانوا خربوا الدنيا على الأخر».
وعن رايه في أوسوريو تابع : « مدرب الزمالك معذور، الناس اللي بتتكلم و تقولك لازم يلعب بديفندر، مبقاش فيه حاجة اسمها ديفندر ومهاجم لازم اللاعيبة كلها تهاجم وتدافع، ده كلام عبيط من ناس مش فاهمة كورة ».
و استرسل: « فوز الأهلي على الزمالك هو تتويج الفريق عن البطولات اللي حصلنا عليها في الفترة الأخيرة، لو كنا خسرنا من الزمالك كان هيبوظ فرحتنا».
وأكد :«هدف النادي الأهلي دائمًا بطولة لكن الناس التانية هدفها تكسب الأهلي ».

الأهلي هينافس على كأس العالم للأندية

وعند سواله عن كأس العالم للأندية قال« نقدر ناخد مركز متقدم احسن من المركز الثالث اكيد، وده مش بعيد نقدر نوصل النهائي أن شاء الله ».
وبعد انضمام إمام عاشور للأهلي أتم: « من أحسن الصفقات اللي اتعملت في الأهلي، سيبك من اللي بيقول إمام زملكاوي أحنا في عالم احتراف، و أهم حاجة مصلحة النادي، سيبك من المبادي والأخلاق والكلام الأهبل ده، كل ده كلام هجص، أهم حاجة مصلحتي تتم ».
وتابع :« المبادي والكلام ده هجص وأحنا جبنا إمام من ميتلاند مش من الزمالك يبقي ايه علاقته بالمبادي، أما الإدارة مشت أيمن أشرف ابن النادي يبقي أحنا كدا خاينين».
عن انضمام فتوح أو زيزو من الزمالك واصل كلامه:« اه طبعا نفسي يجوا الأهلي، احنا في عصر الأحتراف ».
و اختتم كلامه:« الأهلي محتاج مهاجم كبير، يليق باسم النادي، مش اللاعيبة النص كوم دي ».