حسين حجاج: مش هشتغل تاني مع السبكي لو هاخد دور بطولة لأنه بيتعامل بفهلوة مع الأجور

كشف الفنان حسين حجاج عن سبب رفضه للعمل مع المنتج أحمد السبكي قائلا:' رفضت الشغل مع منتج بسبب سلوكياته لأنها مش كويسة مع الممثلين عشان كده قررت مش هشتغل معاه تاني حتى لو هيديني بطولة.

أضاف حسين حجاج خلال حواره مع الإعلامية انجي هشام في برنامج المنسي عبر قناة هي: مبيدفعش أجور كويسة وفي مرة كنت شغال معاه فيلم واتعودنا في شركات الإنتاج إننا تاخد ١٠ في المئه ولباقي في اللوكيشن إنما دا ممكن تروحيله الشركة وانتي مش عارفة هيدفعلك كام، عنده فهلوة ومبيحبش يدفعلك اللي انتي تستاهليه لازم أقل.

تابع :اشتغلت معاه مسلسل وبعد سنتين اتصلوا بيا من فترة واحد قالي على فيلم قلتلوا مع مين قالي السبكي قلتلو لا مش هشتغل معاه تاني.

حسين حجاج ومسلسل الكبير الجزء الأخير

كشف الفنان حسين حجاج سبب اعتذاره عن الأعمال الفنية ما عدا مسلسل " الكبير " قائلا: "اعتذرت علشان خاطر رجلي وجعاني والفنانين والمنتجين إدوني عذري".

تابع خلال حواره مع الإعلامية انجي هشام في برنامج المنسي عبر قناة هي: "لما بكل تواضع يقولي مش هقدر اشتغل من غيرك ده موقف ولما يقولي الشغل من غيرك مش هيبقي له طعم ده موقف، مكي مواقفه كتيره ويخليكي لو بتجرجري في رجلك هتشتغلي".

وتحدث عن رأيه في الهجوم على أحمد مكي قائلا: "محدش هاجمه غير في الجزء الأخير واعتبر أن الجزء الاخير ملحقوش يكتبوه كويس والناس كانت مستنية يكون في جديد لكن في الآخر اتشاف".

حقيقة خلاف حسين حجاج ومحمد هنيدي

وكان قد تحدث الفنان حسين حجاج حقيقة خلافه مع الفنان محمد هنيدي وسر عدم تعاونهما سويًا بعد شخصية لؤي، مشيرًا إلى أنه هو من قال له لا أريد أن يعمل معه.

وقال حسين حجاج خلال لقائه مع الإعلامية إنجي هشام: مش زعلان من هنيدي كل الحكاية أن كان في لقاء تليفزيون وقالو لي مبيسألش عليك قولتلهم مبيسألش أنا اشتغلت معاه فيلم صعيدي في الجامعه الامريكيه وكان فيلم ناجح جدًا.

وأضاف: مرة قابلته بعدها بسنه أو اتنين قولتله ايه انت نسيتني ليه؟ قالي مينفعش نشتغل مع بعض تاني قولتله طب ليه قالي اصل المشهد بتاعك كان حلو والناس لسه منسيتش لؤي لما الناس تنساه نرجع نشتغل تاني مع بعض.

وواصل: لقيت كلامه مش منطقي الناس لما بتلاقي حد ناجح في مشهد بتجيبه لكن ده بيقول العكس لكن أنا مش زعلان منه ولا حاجه هو حر، أنا معرفش هوا جواه ايه أنا قابلته ساعتها في هيلتون رمسيس وكان معاه ساعتها الاستاذ هاني رمزي وانا كنت رايح اسلم على هاني رمزي.