أحمد سعد يكشف حقيقة إهانته لسيدات تونس: مينفعش حد يشتمني ويقولي أنت مش محترم

كشف الفنان أحمد سعد مستجدات في أزمته مع منظمة حفل تونس الأخير، واتهامه بأنها تشاجر معها بسبب سوء التنظيم.

وقال أحمد سعد في تصريح تلفزيوني: أنا بحترم المرأة التونسية ومعاش ولا كان اللي يغلط في المرأة التونسية ، وعندنا الفنانات التونسيات لما بيطلعوا يتكلموا احنا بنسمع لهم وبنستفاد.. ولكن اللي غلط في المرأة التونسية هو اللي عمل رمز السيدة التونسية في الأزمة دي.. السيدة التونسية متعملش الحاجات اللي حصلت.. السيدة التونسية متشتمش ضيف وتقوله انت مش محترم.

وواصل: أنا نزلت من باب الحفلة ملقتش العربية مستنياني وواحد صاحبي وصلني وروحت ومكانش في بند في العقد إني أعمل أحاديث صحفية لأن مكانش في غرفة مخصصة للمؤتمر الصحفي وأنا جاي مهرجان قرطاج وهعمل وقتها مؤتمر صحفي دقيق ومنظم وأنا موعدتهاش إني أعمل أحاديث وعندي رسايل بينا تثبت الكلام ده.

وأضاف: وأنا بغني فوجئت براقصين طلعوا على المسرح، وطبعا معملناش بروفة ولا أي حاجة ومكانش في تناسق لحد ما طلبت من المنظمين ينزلوهم وأنا مش بحب أكسر بخاطر حد لكن أنا اتفاجئت بيهم وشكلهم كانوا أول مرة يطلعوا على المسرح ودا شيء مهين لكل الأطراف ودا بيدل على سوء التنظيم، ومحصلش إني سبت الحفلة بسبب ضعف الإقبال اللي حصل إنها جابت مطرب تاني مصري والطبيعي يغني قبلي عشان الناس جاية علشاني.. لكن خلتني أطلع قبله ودا اللي خلى الجمهور يمشي لأنه جاي علشاني.

وأختتم أحمد سعد قائلًا: ما خلصت الحفلة فوجئت إنها عازمة صحفيين وواقفة تقولهم إني مشيت ومعملتش حوارات وأنا متفق على كدا فرجعت ليها تاني علشان أقولهم بكل احترام السبب اللي خلاني معملش حوارات فوجئت بيها بتهاجمني وأفشت أجري في الحفلة ودا مينفعش فقولتلها لو سمحتي اسكتي 3 مرات أنا ملتزم بالأخلاق ولم أسب ولم أقذف.. احتراما لما حد يتكلم مع صحفيين مينفعش تقاطعيني، وبعد ما أفشت أجري قولتلها اخرسي،أنا واثق في القضاء التونسي، ومقدرش أحصر المرأة التونسية في منظمة الحفل، المرأة التونسية هي النزاهة والصدق وكثيرة الاحترام وأنا أسمع لها وأستفيد منها، لا اقبل على السيدة التونسية أن يكون هذا شكلها.. وأشكر وزارة الثقافة التونسية على موقفها بعدما ألقت اللوم على منظمة الحفل اللي قالتلي إن الحفلة تبع الحكومة ودا طبعا غلط.. كنت فاكره مهرجان بنزرت الدولي.