رامي جمال: إحنا جيل بيشوف الانفصال والطلاق سهل وده سبب خراب البيوت

كشف الفنان رامي جمال عن سبب انتشار ظاهرة الطلاق من وجهة نظره وذلك من خلال منشور له عبر حسابه الشخصي بموقع التواصل الاجتماعي “انستجرام”.

وكتب رامي جمال:“إمبارح قبل ما أنام جاتلي الرسالة دي وفرحتني جدا وعاوز أقول حاجة من واقع حياتنا الدنيا متعاشة مرة واحدة متفرطوش في اللي بتحبوهم بسهولة إحنا للأسف جيل بيشوف الانفصال والطلاق سهل رغم إننا إتربينا في بيوت كان بيحصل فيها مشاكل.

وأضاف:لكن كانوا أهالينا متمسكين إن البيوت دي ما تتهدش بسهولة، مشاكل الحياة كتير لكن متخلوش الأفلام والمسلسلات وحكاوي الناس تخليكم تطلبوا أو تستنوا من اللي بتحبوهم كل حاجة، وما تعلوش سقف توقعاتكم إحنا اتعلمنا إن البيوت تتهد على العرض والكرامة فقط لكن خلافات الدنيا العادية لا.

وواصل:ما تفتكروش إن فيه حد حياته كاملة زي ما بتشوفوها على إنستجرام والمسلسلات والأفلام لو كل واحد وواحدة اتهيالهم إن الانفصال هيخليكم بكرة تعيشوا بحرية.

وأختتم رامي جمال قائلًا: وتلاقوا فرص وشركاء أحسن هتضيعوا من إيديكم ناس احتمال كبير ما تتعوضش، إحنا عايشين مرة واحدة سامحوا وحبوا وفوتوا لبعض وامسكوا في حبايبكم، واخيرا محدش عايش حياتك وأنت بتحكي لحد عن مشكلتك مع شريكك خليك واثق إن رأيه وحياته مش قاعدة لازم تكون صح.