حمادة هلال في حوار خاص لـ موقع «بصراحة»: الكوميديا من أصعب أنواع الفن.. ولو ظهر جن في كواليس المداح كنا هنطير في الجو ولوسي لما قالت كده كانت عندها برد

أعرب الفنان حمادة هلال عن سعادته البالغة بردود الفعل الإيجابية على مسلسل “المداح”، بأجزائه الثلاث، مشيرًا إلى أن أبنائه يتابعون العمل.

وقال حمادة هلال في لقائه مع موقع “بصراحة”: ولادي بيتابعوا المداح ومن جمهوره ودي المفاجأة برغم إنهم مش بيتابعوا عربي خالص وأنا دايمًا بزعل منهم وبحاول أقنعهم إننا عندنا حاجات جميلة تستحق المشاهدة.

نجاح المداح

وأضاف: ولادي بيعشقوا المداح لأنه فيه حاجات ليها علاقه بالبطل الخارق والنوع ده هما بيفضلوه جدًا ومستغرب أوي من ده.

وواصل: تصوير المداح سواء من الجزء الأول للتالت كان صعب ومتعب أنا لو بصور مشهد صغير بشوفه صعب لأن صابر شخصية مختلفة وله ريأكشنات مختلفة ومخصصة ولازم يقول جمل معينة مش أي حاجة لأن دي توجهيات المخرج.

وعن إمكانية تقديمه أعمال كوميدية قال حمادة هلال: وارد أعمل دراما كوميديلأن الكوميديا في دمي أنا مش كوميديان لكن بكون عايز أعمل حاجة مختلفة لأن الكوميديا صعبة جدًا من أصعب أنواع الفن وعايز أخوض التجربة بحاجة محترمة.

حمادة هلال يرد على لوسي

ورد الفنان حمادة هلال على تصريحات لوسي بوجود جن في اللوكيشن، قائلًا:محصلش أي موقف من الجن في كواليس العمل وبعدين المسلسل 3 أجزاء لو حصل حاجة كان زماني طاير في الجو، لوسي لما قالت أن في جن في اللوكيشن، كان الجو برد اليوم ده وهي كانت لابسه خفيف وجتلها رعشة بسبب البرد مش أكتر.

مسلسل المداح 3

مسلسل «المداح» الجزء الثالث من بطولة حمادة هلال وهبة مجدي ويسرا اللوزي ومحمد عز وعصام السقا ودنيا عبد العزيز وحنان سليمان وهلا السعيد وعفاف رشاد وخالد سرحان ومحمود عامر وبسمة ماهر وتامر شلتوت وسلمى أبو ضيف ورانيا فريد شوقي ومحمد مهران ولوسي وعبد العزيز مخيون وأحمد ماهر وصبحي خليل وأحمد كشك، إنتاج شركة سكرمو ميديا- إسلام المرسي، من تأليف وليد أبو المجد وأمين جمال وشريف يسري ومن إخراج أحمد سمير فرج.