خالد الجندي يرد على منتقدي سياسة الدولة: لولا الطرق والكباري التي لا تعجب البعض لخنقتنا الأزمات المرورية اليوم

رد الشيخ خالد الجندي، عضو المجلس الأعلى للشئون الإسلامية، على تعليقات بعض الأفراد بشأن افتتاح الرئيس عبد الفتاح السيسي لمجمع الأسمدة الأزوتية في العين السخنة.

افتتاح الرئيس عبد الفتاح السيسي مجمع الأسمدة الأزوتية

وذكر الجنديخلال حلقة برنامجه لعلهم يفقهون المذاع على فضائية dmc، اليوم الأربعاء: أي أب بيدفع فلوس في بيته الفلوس تنقسم إلى قسمين فلوس ظاهرة وفلوس مستترة، مضيفا: دايما الأولاد يشوفوا الفلوس الظاهرة في الفاكهة أو اللحم أو الفراخ أو الهدوم الجديدة، إنما ولادك لا يشوفوا فلوس الكهربا والمياه والضرائب ومصاريف المدرسة.

الجندي: نادر لما بنلاقي ولاد بيشكروا ولادهم

وتابع خالد الجندي: مشكلة الفلوس المستترة إنها نادر جدًا لو لقيت حد من ولادك بيشكرك علشان دفعت فلوس الكهرباء أو المياه أو الإيجار أو مصاريف المدرسة، وأنا شخصيا لم أسمع عن واحد بيقول لبابه شكرا يا بابا إنك دفعت فلوس الكهرباء أو الإيجار أو مصاريف المدرسة، ولكن لو جبتله ساعة هيقولك متشكر لو جبتله أكلة كويسة لأن دي فلوس ظاهرة.

واستكمل خالد الجندي، عضو المجلس الأعلى للشئون الإسلامية: الإنفاق المستتر أكبر بكتير من الإنفاق الظاهر، وهي دي مشكلة الدولة أنها تدفع أموال باهظة ومليارات علشان توفر لينا بنية أساسية توفر بها كل الخدمات، مثل الصرف الصحي ولولاه كانت البلد تدمرت.

الطرق والكباري

وأردف خالد الجندي: الطرق والكباري اللي مش عاجبة بعض المرتزقة الخونة والمأجورين، لولا إنها اتعملت كنا أصبنا بحالة تجمد، بعض المناطق المختنقة مروريا أنت كنت بتتحاشاها، كانت وصلت إنها كانت كده، اتعملت الكباري والطرق والشوارع والناس لسه دماغها في حلة الشوربة وحتة اللحمة.

وأكمل خالد الجندي: صحيح حتة اللحمة مهمة ولكن فيه حاجات لها أولوية كان لازم نلجأ إليها، فشبكة الكهرباء التي كانت متهالكة وصلنا لحال إننا كنا هندخل على اللمبة الجاز تاني، وكنا هننزل كل واحد يشتري اللمبة الكلوب، وكان هناك انقطاع للتيار وتلف الأجهزة لكن أصبح بها فائض يتم تصديره.

مشكلة أنبوبة البوتاجاز

وتابع خالد الجندي: مشكلة أنبوبة البوتاجاز تم القضاء عليها تماما، هذا الكلام لا يُرى من قبل بعض الناس، ومن ثم بيهدروا كل مجهود الدولة بسبب ارتفاع الأسعار، لازم حد يقول كلمة الحق ويتحمل حتى لو وُصف أنه بيطبل لبلده، أه قول أنا بطبل لبلدي هو أنا هخاف منكم، هو أنت هتعمل حساب لبعض الخونة والمرتزقة، مضيفًا: اتكلم على المستشفيات والمدارس وشبكة الصرف الصحي، واتكلم عن التعليم وغيره، والنبي قال: لا يشكر الله من لا يشكر الناس.

وافتتح الرئيس عبد الفتاح السيسي مجمع الأسمدة الأزوتية التابع لشركة النصر للكيماويات الوسيطة، وذلك برفقة عدد من الوزراء.