علاء ميهوب: «اللي يزعل يزعل الأهلي ميخسرش خمسة أبدا إزاي أصلا يحصل كدا دي نتيجة مهينة»

فتح علاء ميهوب مدرب الأهلي السابق النار على لاعبي النادي الأهلي بعد الفضيحة المدوية بالخسارة بخماسية أمام صن داونز في دوري أبطال إفريقيا مشيرًا إلي أن اللاعبين تتحمل الجزء الأكبر من الخسارة.

الأهلي اتهان وميخسرش خمسة أبدا

وقال “ميهوب” :”أنا بتكلم على دوري كلاعب فين، الأهلي ميخسرش خمسة أبدا، وهقول حاجة واللى يزعل يزعل كل أهلاوي النهاردة حاسس انه اتهان إزاى الأهلي يخسر خمسة والله العظيم إهانة اللى حصل ليه نخسر خمسة دى نتيجة مهينة”.

وأشار :”الله العظيم أصغر أهلاوي النهاردة حاسس إن فيه إهانة حصلت للفريق، وازاي أخرج من الملعب وأنا الأهلي خسران خمسة والجماهير هتموت من الاهانة، والمفروض دلوقتي اننا نتكلم على الإمكانيات”.

وأضاف “ميهوب” خلال الاستديو التحليلي للقاء على قناة “الأهلي” :”هل منطق إن الأهلي كل سنة إن فريق تاني يخدمني النهاردة فيه ناس لعبت ومحستش بيها في الملعب، وللأسف المنافسة بين اللاعبين غائبة بسبب المدرب”.

وتابع :”المدير الفني الطبيعي بيكون مطلوب منه شغل وواجبات معينة واللاعبين كذلك الأمر عليهم تنفيذ أقصى أمر مطلوب منهم من تعليمات المدير الفني حتى لو شايف إنها غلطت”.

وواصل”ميهوب” هجومة على لاعبي الفريق “قائلا :”مفيش لاعب تحس عليه إنه هيموت من اللى حصل، انا لو مكان اللاعبين كنت أدفن في الملعب، لازم الناس دي تعرف إنها أهانت النادي الأهلي ولازم اللاعيبة تحس إنهم عملوا مصيبة”.

واختتم :” لازم اللاعيبة يوصل ليها مدى الكارثة اللى حصلت ويعرفوا إن اللى عايز يمشى يمشى واللى معاه عرض يجيبه ويمشى عايزين رجالة في الملعب ويعرفوا انهم من غير الأهلي صفر”.