محمد حماقي: أغنية ما بلاش بتحكي اللقاء الأخير بيني وبين أبويا

تحدث الفنان محمد حماقي، عن كواليس أغنيته الشهيرة مابلاش، والتي حققت نجاح كبير لدى الجمهور، مؤكدًا أن الأغنية ليس لها علاقة بـ زوجته ولكنها تتحدث عن اللقاء الأخير بينه وبين والده الراحل.

تفاصيل الأغنية

وقال محمد حماقي، خلال حواره مع الفنانة إسعاد يونس، في برنامجها صاحبة السعادة، المذاع عبر شاشة قناة DMC: الناس ربطت أغنية ما بلاش بـ انفصالي عن نهلة ولكن إحنا كنا رجعنا ومأعلناش، وكنت صورت الكليب بتاع الأغنية والجمهور لقى شكر خاص لـ نهلة في آخر الكليب وافتكروا أن الأغنية ليها.

كواليس الأيام الأخيرة فى حياة والد حماقي

وتابع كاشفًا كواليس اليوم الأخير في حياة والده: أبويا الله يرحمه آخر يوم كنا مع بعض فيه كان في فرح بنت خالي ومزاجه كان منطلق وكان بيسلم على كل الناس، وأنا بغني كنت تعبان وبشتكي للفرقة على المسرح إن بطني مضايقاني، وهو خارج مع أمي كنت واقف مع حد من أصحابي من الفرقة راح جه وإدالي ملبس وقالي حلي بوئك على الغنى الحلو ده، وسلم عليا ومشي وبعدين لما روح كلمني ودي مش من عادته، وكمان كلم أخويا طارق، وتاني يوم 9 الصبح جالي خبر وفاته، ودي كانت صدمة ومرحلة وحشة مش هقدر أقول عليها يوم.

وأضاف متحدثًا عن فكرة أغنية مابلاش، قائلًا: كنت واخد لحن من تامر علي قبل وفاة أبويا وكان مكتوب ما بلاش تغيب عنا تاني ما بلاش تغادر أراضينا، بس كده وأنا كنت مبنزلش ولا بكلم حد، وأمير طيعمة صاحبي جدًا وجالي عشان يحاول يخرجني، وكان بيواسيني وقولتله يا أمير عندي أغنية عايزك تكتبها وسمعته ما بلاش، فالكلام اللي اتكتب في الكوبليه ده الحقيقة اللي حصلت معانا، وهو كتب اليوم واللقاء الأخير اللي بيني وبين أبويا في الأغنية، والحقيقة إنه وصل كده للجمهور.