سهير جودة تدعم ويجز: مختلف وبيشارك في أكبر حدث رياضي عالمي وهو عنده 24 سنة

حرصت الإعلامية سهير جودة، على تهنئة مطرب الراب المصري ويجز، في اختياره للغناء في حفل ختام نهائي كاس العالم قطر 2022، قائلة: «من يدعمه الجمهور هو بالجمهور مكتفي لا يعطله أحد، هو دة ويجز، ويجز هو تلخيص لشباب كتير عندهم أحلام، هو مصدق نفسه وحلمه عشان كده هو بالنسبة للشباب النجاح العصامي اللي بدأ من السوشيال ميديا».

وأضافت سهير جودة في برنامجها الذي يحمل اسم «الستات»، والمذاع عبر فضائية «النهار»، قائلة: « لما الصفحة الرسمية للاتحاد الدولي لكرة القدم أعلنت ان أغنية عز العرب لمغني الراب المصري ويجز هتبقى إحدى اغاني ألبوم كأس العالم، دي المرة الاولى اللي بيشارك فيها مغني مصري في الالبوم الرسمي للبطولة، وهو ترند رقم ٢ على يوتيوب ، و هنشوفه في حفل ختام كأس العالم».

واشارت: «ناس كتير جدا شايفين ويجز انه نموذج ملهم، وناس تانية شايفين اللي بيقدمه مش غناء، لو ذوقنا الشخصي هنقيس بيه الأحداث هنلاقي حاجات كتير مش فن، وخلينا نقيس بنسبة النجاح والنجومية، اكيد في ناس مصدقه ويجز، هو عنده شئ مختلف، هو حالة مختلفة، ولد ابتدى صغير والنهاردة عنده ٢٤ سنة، و حقق شهرة عالمية و اسمه بيتردد باحترام بين النجوم.. إذا هو عنده شئ مميز ومختلف».

وأوضحت سهير جودة: «انا قريبة للناس اللي ذوقهم مش ويجز في الاغاني، لكن لازم نحترم هذا النجاح، أغنية عز العرب بالمناسبة حلوة جدا هو كاتب كلماتها، وخلينا ندعم الشباب المصري، وويجز نموذج بيحقق حلم الشباب في النجاح و الإنجاز ، و بيتقبل الاخر، اعتقد الاجيال الجديدة معندهمش تنمر وعنصرية زي اللي كانت في الأجيال السابقة».

واختتمت: «مش بالضرورة نكون متفقين كلنا على ذوق واحد ، لكن منحكمش على حد بذوقنا الشخصي ونقول ان دا لا يتوافق مع ذوقي فيبقى ايه الذوق ده والفشل دا، خلينا نبقى موضوعيين في الحكم، وشئنا ام ابينا ويجز هو نجم ملهم للجيل الحالي».