مجدي عبد الغني يفتح النار على ادارة الأهلي: «كفاية جبروت وافترى»

كان الأهلي تقدم بشكوى ضد مريم مصطفى لاعبة الفريق بسبب انقطاعها عن التدريبات بعد تجديد عقدها مع النادي، فيما تقدمت اللاعبة بشكوى بإعلان رغبتها الانضمام إلى الزمالك والتشكيك في تعاقدها مع الأهلي

وقال مجدي عبدالغني، في تصريحات تليفزيونية عبر فضائية «الشمس»: «كابتن هناء حمزة، هى كابتن النادي الأهلي لعبت في النادي 20 سنة، وتعرف كل أعضاء مجلس إدارة الأهلي بمن فيهم الأعضاء الصغيرون، ليه الأمور تصل إلى هذا الحد؟، هل عشان نزول ابنها انتخابات الأهلي في قائمة محمود طاهر؟، معتقدش ابنها مكانش الراحل صالح سليم، يعني!، هو دخل الانتخابات لمجرد أنه يرغب في دخول الانتخابات، قائمة محمود الخطيب لم تختره اختارته قائمة محمود طاهر»

وأضاف: «محمود طاهر، وقائمته سقطت ونجحت قائمة الخطيب، انتهت الانتخابات يجب نشوف مصلحة النادي.. مصلحة الأهلي هى أن يلم ولاده حواليه في جميع الألعاب».

وتابع: «أي مجلس إدارة يأتي يجب أن يحترم نجوم النادي القدامي في جميع الألعاب، لأنهم أعطوا للنادي الأهلي وأحرزوا بطولات للنادي».

وأشار: «ابنة هناء حمزة، وقعت على بياض، هى تتحمل التوقيع والنادي الأهلي يبقى عادل معاها.. أنا ماقولتش إنها على حق، هى مش على حق لأنها مضت على بياض، مضت على أساس إن النادي الأهلي سيكون عادلا معاها وهذا هو عهدنا بالنادي الأهلي طول عمرنا، عمر ما حد وقع للنادي الأهلي وهو شاكك إنه مش هيحصل على حقه أو شاكك إن الأهلي هيظلمه ما بالكم بنت كابتن النادي الأهلي ومنتخب مصر في الكرة الطائرة النسائية».

وأردف: «الموضوع بسيط مش محتاج تصعيد ونفرض عضلاتنا على بعض، المسألة مش مين أقوى بين مجلس إدارة ولجانه الإلكترونية وهناء حمزة وبنتها، هى مش مصارعة».

ووجه مجدي عبدالغني رسالة إلى مجلس إدارة الأهلي قائلًا: «إنتوا عاوزين البنت اقعدوا معاها وراضوها الموضوع بسيط ويتلم في ثواني، ولكن واضح من كتر القوة والجبروت بتاعت مجلس إدارة الأهلي معندوش أي نوع من أنواع التسامح، حاسس بعضلاته، زي واحد بتاع كمال أجسام يدخل شارع أو حارة ويقفلها، في النهاية ربنا موجود، شوف الراجل ده بتاع كمال الأجسام بعد 10 أو 20 سنة هتلاقوه مش قادر يمشي».

وأضاف«أوعى العنجهية تاخدك وأوعى الافترى ياخدك خليك متسامح وتواضع لله، مش معنى إنك أصبحت عضو مجلس إدارة للأهلي أو الزمالك أو أي من الأندية تفتري على خلق الله، إدي لكل واحد حقه».

وواصل: «في عقلاء كتير موجودين في مجلس الإدارة، لو الخطيب مش موجود، في العامري فاروق وخالد مرتجي يقعدوا ويحل الموضوع بدل من البيانات.. الأهلي عمره ما كان بيعمل كده، هما حاسين إن عندهم صفحات كتيرة في السوشيال ميديا بيفتروا على الناس، ليه حرام عليكم ميصحش اللي بيتعمل». وأردف: «ليه قلة الأدب في صفحات السوشيال ميديا؟، هو إنتوا كده متخيلين إن أي حد هيثق بعد كده في النادي الأهلي بعد ما بتشتموا كباتن النادي، كل لاعيب هييجي يلعب يطلع كل اللي عنده عشان يشتم بعد كده.. اللي بتعملوه على صفحات الفيس بوك مش صح».

وأردف: «الموضوع يخلص في 10 دقائق، هات مريم مصطفى ووالدتها وخلصوا الموضوع، لو البنت تهمكم عدلوا عقدها مثل زميلاتها ولو البنت ملتزمكوش سيبوها تمشي لوجه الله تعالى مش تبطلوها! ،اعتبروا عملتوا عمل لوجه الله سبحانه وتعالى».

واختتم مجدي عبدالغني تصريحاته قائلًا: «من البيان واضح أن مريم مصطفى من حق النادي الأهلي وهي غلطانة، ولكن باريت الموضوع ينتهي بعقلانية».