تعرف على رسالة تامر حسني للمطرب النقاش أحمد سالم

أعرب الفنان تامر حسني عن سعادته للمطرب النقاش، الذي أستطاع خلال الأيام الماضية أن يخطف القلوب والآذانبسحر صوته العذب، مما دفع البعض من المشاهير لعرض عليه تحقيق حلمه.

وكان من ضمنهم الفنان تامر حسني، الذي شارك صورةً، عبر خاصية ال"ستوري"، بصفحته الرسمية، بموقع تبادل الصور والفيديوهات "إنستجرام".

وعلق الفنان تامر حسني على الصورة التي بها صورة النقاش، قائلاً:" هتضحكلك الدنيا يا أحمد باشا، بأذن الله، مفيش شئ بعيد عن ربنا، وصبرك وإجتهادك وعرقك وشقاك في شغلك".

وتابع:" ده شرف كبير وربنا قادر بسببهم يكافئك، من حيث لاتحتسب، سمعت إنك بتحضر أغنية، حضرها وإن شاء الله هحققلك حلمك اللي انت كتبته، واقدمك به على مسرحي، لكل جماهير الدنيا".

وأختتم كلامه:" يارب تبقي بداية خير ليك ياحبيبي، ربنا يفرح قلبك انت وكل حد بيحلم، يحقق أي شئ".

يذكر أن، كشف الفنان تامر حسني عن بداية مشواره الفني، وذلك بعد وعده لجمهوره مؤخرًا، بالحديث عن تجاربه في الحياة، بكل ليلة.

وفي أولى حلقاته قال تامر حسني في منشور عبر حسابه الشخصي بموقع التواصل الاجتماعي فيسبوك:"قرأت معظم التعليقات على قد ما قدرت على اخر بوست ليا اللي فوق و فهمت اكتر حاجتين من تعليقاتكم عاملين احباط لمعظمكم، اليأس من النجاح، احباط المقربين .

وتابع :"و بعضكم واصل لفقدان الامل و الشغف و بعضكم فاقد الامل في الحياه نفسها.

وبادر بتقديم طلباً لهم:" هطلب طلب منكم قبل اي شيء افتكروا معاناتي في بدايتي و ظروفي الصعبه من غير اب و منغير اي فلوس و بنزل اشتغل في الشوارع من عامل بنزينه لسوبر ماركت لفاعل يعني اللي بيبنوا العمارات بطلع طوب و اسمنت عشان ارجع بيتي لامي الغلبانه بأي خمسه جنيه. وأضاف:" مرتب النادي لما كنت بلعب كوره كان مرتبي ٢٢ جنيه في الشهر منهم بقى تحويشة الميه و الكهربا و عمليات اخويا عشان كان عيان لفتره كبيره كنت بعمل المستحيل فعلاً عشان امي و اخويا و عشان اوصل لهدفي.

وأكد:" كان جوايا سعي دائم لطريقين الكوره و الغناء و بقول دا عشان ناس كتير عايز انصحها بالخطه البديله عشان لو الحلم مجاش يكون في غيره زي ما انا كان نفسي ابقى لاعب كوره و الكوره مش ليا و الانديه كلها مشوني رغم تفوقي كنت بسأل نفسي ليه الابواب كلها بتتقفل في وشي

وأوضح:" اتاريها بتتقفل عشان توجهني لمسار اخر و لما آمنت بكده فهمت قدام ان ربنا كان شايلي الاحسن ليا بس ساعتها مكنتش فاهم .

وأضاف :" واللي بيسأل نفسه دلوقتي يعني انا اكمل في حلمي ولا اشوف حلم تاني هقوله دايماً اطلب من ربنا يساعدك هتلاقي علامات بتجيلك بس الشاطر اللي يفهمها ، علامات هتأكدلك تكمل او لا بس اجتهد و اتعب عشان المجهود دا ليه كرم متحوشلك في مجالك التاني ف اوعى تقول تعبت عالفاضي ، و بالنسبه للمحبطين هيفضلوا موجودين انت اللي بتسمعلهم و انت اللي بتسمح انك تتأثر بيهم

واختتم:"امنع دا فوراً متبقاش السبب في اذية نفسك متتشدش غير لكل جميل و لكل ايجابي هتلاقي كل الحلو بيجيلك و متعملش العكس عشان هيجيلك برضو عشان كدا بقولك انت السبب دايماً قول يارب و اجتهد و افهم ان الراحه المطلقه في الجنه بس و احنا على الارض و ربنا قال انه خلقنا في كبد يعني شقاء عشان يكون عندنا تحدي نكسبه ولازم نكسبه عشان كتير قبلينا كانت ظروفهم اصعب و وصلوا يبقى الموضوع فينا ، متبقاش اكبر عدو لنفسك ، انت السبب ، خد قرار صارم فوراً في التغير و النهوض و النجاح ، والله هتوصل متسمعش غير لقلبك و سلم قلبك للّي خلقه و توكل على الله .