احنا مش بنخلف العيال عشان نستعبدهم.. إسلام إبراهيم يشن هجوما حادا على والد المغني النقاش

شن الفنان إسلام إبراهيم هجوما حادا على والد المطرب النقاش أحمد سالم، بسبب عدم الاهتمام بموهبة أبنائه، وأنه حملهم مسئولية أكبر منهم في سن صغير وفرض عليهم العمل واستعبادهم لمساعدته أخواتهم.

ونشر إسلام إبراهيم عبر حسابه الرسمي بموقع التواصل الاجتماعي "فيسبوك"، قائلاً:"أنا عارف إن الكلام اللي هقوله ده ممكن ميعجبش ناس كتير بس أنا شايف الترند ده من زاوية تانية خالص".

وأضاف:"فكرة انك ربنا يرزقك بشابين زي دول ينطبق عليهم كلمة شباب زي الورد لانهم ربنا كارمهم بالوسامة و الموهبة والصوت الحلو وعندهم المؤهلات انهم يكونوا نجوم ومتحاولش تساعدهم انهم يحققوا حلمهم او يعملوا الحاجة اللي بيحبوها.

وتابع:" كما تفرض عليهم قيود ومسؤوليات مش بتاعتهم زي ان هما يجهزوا اخواتهم البنات اللي اكبر منهم حضرتك البنات دول أنت اللي خلفتهم مش هما والحياة دي حياتك انت مش حياتهم هما وتفرض عليهم يكونوا نقاشين وده مش تقليلا من مهنة النقاش اكيد هي مهنة محترمة وشريفة لكن اي حد مش موهوب يقدر يشتغلها لكن مش اي حد عنده الموهبة والصوت ده .

واختتم كلامه، قائلا:"خلاصة الكلام احنا مش بنخلف العيال عشان نستعبدهم احنا عندنا مفاهيم مغلوطة كتير في فلسفة الجواز والخلفة والتربية وزي ما طاعة الوالدين واجبة واي ابن بيفتح بقه او يعترض علي حاجة مش عجباه بيبقي ابن عاق كمان الولاد امانة هتتسأل عليها قدام ربنا".

المغني النقاش يتصدر التريند بعد طلب رامي جمال مقابلته

في وقت سابق تصدر الشاب أحمد سالم تريند مواقع التواصل الاجتماعي خلال الساعات الأخيرة، وذلك بعد نشر الفنان رامي جمال مقطع فيديو له عبر حسابه الشخصي بموقع التواصل الاجتماعي انستجرام،وطالب الجمهور بالبحث عنه، لمقابلته، وإنتاج العديد من الأعمال الفنية له نظرا لصوته الرائع.

وتواصل موقع "بصراحة"، أحمد سالم المشهور بـ"المغني النقاش"، ليكشف لنا بداية موهبته، وقال في تصريح خاص: "الموهبة موجودة في عيلتنا يعني كلنا بنحب نسمع أغاني ونغني، وصوتنا كلنا حلو، بنحب كلنا ندندن يعني لو عندنا فرح بنحب كلنا بنغني".

وعن بداية ظهور موهبته قال: الموهبة ظهرت عندي من سن 8 سنين، الفيديو المنتشر من سنتين، ومعظم اللي كان بيشجعني أصحابي وأهلي.

وأضاف: السبب الرئيسي في اظهارها الفضل يرجع للاستاذ عمرو حسن، هو اللي شير الفيديو وهو اللي عمل الشغل ده كله.

وواصل: أنا عمري في حياتي ما شوفت عمرو حسن ولا كنت اعرفه خالص، وهو شير الفيديو لوحده من غير سابق معرفه.

وتابع: أنا لما ظهرت مع عبد السلام في فرح شعبي، فمكملتش عشان كل اللي بيبقى في الافراح أهلي فبتكسف جامد وبخجل إني أغني معاهم في أفراح.

وأختتم أحمد سالم قائلًا: رامي جمال اتواصل معايا واتكلم إنه هيعمل معايا أغنية ولسا هقابله ان شاء الله.