على غرار واقعة «مريم ملاك».. طالبة جديدة بالمنيا تحصل على 12.5% بالثانوية العامة.. ووالدتها تستغيث بوزير التعليم: تعبنا طول السنة نفسيا وماديا وفي الآخر ظلموها وعاوزين حقنا

على غرار واقعة «مريم ملاك» التي حصلت على 0% بالثانوية العامة، شهدت قرية المحرص التابعة لمركز ملوي بمحافظة المنيا، نفس الواقعة تقريبا مع الطالبة مريم إبراهيم والمعروفة إعلاميا بطالبة الـ12.5%.

وانهارت والدة مريم إبراهيم، المعروفة بطالبة الـ12.5% في الثانوية العامة، وقالت خلال لايف موقع بصراحة: "مش قادرة أنام من اللي حصل في بنتي، إزاي تجيب 12.5 % في الثانوية العامة وهي متفوقة وكانت الأولى في المرحلة الإعدادية، قلبي هيقف من الصدمة والحزن على بنتي ذنبي هيكون في رقبة اللي ظلمها، انا عاوزه حق بنتي وحد يوصلني بوزير التربية والتعليم، لازم صوتي يوصل للرئيس السيسي، مستقبل بنتي بيروح حرام عليكم ليه تعملوا كده فيها، تعبنا نفسيا وماديا طول السنة عشان في الآخر تجيب 12.5 % ده ظلم كبير".

في البداية، الصدمة أفقدت "مريم" النطق، بعد حصولها على نتيجتها واكتشفت حصولها على 12.5%، رغم حصولها على المركز الأول في المرحلة الإعدادية.

وقالت مريم خلال لايف موقع بصراحة: "روحت أجيب نتيجة الثانوية بتاعتي لقيتني جايبة 12.5%، ودي نتيجة مترضيش ربنا ولا ترضى حد، أنا كنت مذاكرة كويس جدا ودايما أقول لماما وبابا أنا هدخل طب، أنا النتيجة دي مش بتاعتي، محدش مصدق لحد دلوقتي إزاي أنا أجيب 12.5%، أنا كنت مقفلة درجات الفرنساوي والإنجليزي والعربي عشان شاطرة فيهم، وكنت براجع بعد الامتحان إجابتي وكنت بلاقي أخطاء بسيطة خالص، طول عمري متفوقة وطلعت الأولى في المرحلة الإعدادية، أنا عاوزه نتيجتي الحقيقية ومجهودي اللي راح".