شريف خير الله فى حوار مع موقع "بصراحة": أنا ونادية الجندي اللي صنعنا التريند.. ورفضت المشاهد الجريئة في بدايتي لأن ده تاريخ.. ودلوقتي الناس بتعايرني بإفلاسي

شريف خير الله لـ «بصراحة»:

-أنا اللي صنعت التريند في بداية حياتي الفنية

-ابني مش مقاطعني ودي شائعة وعلاقته حلوه بيا

-أنا في بدايتي اتعرض عليا أفلام جريئة ولكن ده تاريخ ورفضت اشتغل تلك المشاهد

-الناس بتعايرني بإفلاسي

تصدر الفنان شريف خير الله مؤشرات البحث جوجل في الساعات الأخيرة، وذلك بعد لقائه في أحد البرامج التلفزيونية، وحديثه عن حالته المادية، ولكن من الواضح أن حديثه فُهم خطأ من الجمهور.

وحاور موقع “بصراحة”، الفنان شريف خير الله ليوضح ما حدث، ويكشف حقيقة الشائعات التي طاردته في الآونة الأخيرة.

كيف تتعامل مع الشائعات التي تطاردك بعد الظهور إعلاميًا؟

أنا بحاول أبعد عن الشائعات اللي بطاردني، وأنا قررت مش هطلع في برامج تاني لان من الواضح إني لما بطلع بعمل مشاكل، أنا راجل عجوز معرفش يعني اي تريند، وواضح ان ده غلط وبيعمل مشاكل لما بتكلم.

كواليس ما تم في آخر لقاء.. وهل في أزمة بينك وبين الفنان أشرف زكي؟

الناس فهمت كلامي غلط في آخر لقاء هماعرضوا عليا في اللقاء مشهد في حلقة من الاختيار واشادوا بيها، وكيف كانت شخصيتي كويسه وسألوني عن غيابي في آخر فترة قولتلهم السبب فالناس فكرتني متسول، وقعدوا يطلعوا كلام عليا ويوقعوا بيني وبين أشرف زكي لكن استاذ اشرف زكي حبيبي وعمري ما ازعل منه.

هل توافق على المشاهد الجريئة؟

انا في بداية مسيرتي اتعرض عليا اشتغل افلام جريئة، ومشاهد كتير ولكن رفضت لأن ده متعلق بتاريخي الفني، مش معنى إن عملت حاجات خفيفة يبقى مش فنان.

تعليقك على الانتقادات التي وجهت لكالفترة الأخيرة؟

الناس بتقولي شوفلك شغلانه تانية غير الفن، لكن انا معرفش اشتغل غير في الفن، أنا كده وشغلي كده أنا معايا بكالوريوس وطالع بجيد جدا ومتعلم على فكره.

هل أبنك مقاطعك فعلًا ولا دي شائعة؟

في شاعات طلعت إن ابني مقاطعني لكن أنا ابني مش مقاطعني نهائي، هو بس فترة شباب وثانوية وكل الشباب كده مش ابني لوحده.

كلمنا عن تعاونك مع نادية الجندي في فيلم عصر القوة؟

أنا لو عايز التريند فانا عملت تريند لما ظهرت مع نادية الجندي في فيلم عصر القوة، وشخصيتي حققت نجاح كبير وقتها، والكل اتعلم عنها فلو عايز تريند زي ما بيقولوا فانا اللي بدأت التريند وصنعته.