أحمد التهامي: كل ما بنجح بيطلعوا يقولوا إني مُت

كشف الفنان أحمد التهامي عن عدد من الأسرار والتفاصيل الخاصة بمشواره الفني وحياته المهنية، خلال ظهوره ضيفًا على برنامج «واحد من الناس» مع الإعلامي عمرو الليثي، حيث تحدث بصراحة عن أبرز المحطات التي مر بها في مسيرته، وكواليس أعماله الفنية، إلى جانب مواقف وتفاصيل لم يكشف عنها من قبل.

وتحدث أحمد التهامي عن الشائعات التي طالته بعد نجاحه في فيلم «التجربة الدنماركية» ومسلسل «فرقة ناجي عطالله»، وقال: بعد التجربة الدنماركية وكان مكسر الدنيا وقتها، ولقيت معظم الزملاء في الوسط حتى اللي مفيش بينا تواصل بيكلموني، وإيمان العاصي كلمتني وقالت لي إني نازل عليا الخبر إني توفيت بسبب حادثة، ومش عارفة ليه دايما بيلازمني إشاعات إني مُت بعد كل نجاح بحققه. 

وأضاف: وفيه كمان إشاعة طلعت عليا لما كنت بصور فرقة ناجي عطالله إني اتصبت إصابة جامدة جدا، أنا اتصبت فعلا  وحصلي لي قطع في العضلة الأمامية وإحنا بنصور مشاهد البحر في بور سعيد، ، وقالوا ساعتها إني وقعت من فوق جبل وحصل لي إصابة قوية ، وإني مش هقدر اشتغل تاني

الصلح بين أحمد السقا وأمير كرارة ومها أحمد

وعن تدخله للصلح بين أحمد السقا وأمير كرارة من جهة  ومها أحمد من جهة أخرى، قال أحمد التهامي: مبحبش اتكلم بس الواحد في إيده يعمل حاجة كويسة يعملها، ومها أحمد وجوزها مجدي كامل إخواتي، وعشرة عمر وأمير كرارة حبيبي، فا لو فيه وسيلة إني أصلح بينهم ليه لأ إحنا إخوات وصحاب وبتنتقابل دايما ، ومش دي الحاجة اللي اصدرها للجمهور.