عمرو دغيدي يكتب.. من 3 شهور هشام عز العرب دق جرس الإنذار

في مايو اللي فات، هشام عز العرب الرئيس التنفيذي لـCIB حذر من التوسع في التمويل الاستهلاكي والقطاع المالي غير المصرفي.

وقال إن بعض جهات التمويل بتمنح ائتمانًا من غير نفس صرامة التقييم الائتماني الموجودة داخل البنوك، وحذر بوضوح: «لو واحد وقع ممكن يعمل تأثير في الاقتصاد كله ويجر الباقي معاه».

الكلام عمل جدل كبير جدًا وقتها، واتعرض عز العرب لانتقادات من داخل وخارج القطاع، وبعض الأصوات قالت إنه بيضخم المشكلة، وإن نسب التعثر محدودة وإن شركات التمويل خاضعة أصلًا للرقابة المالية والـI-Score.

يعني باختصار: الراجل حذر… فبدل ما نناقش التحذير، جزء من النقاش اتحول للهجوم على صاحب التحذير.
وعدّت حوالي 3 شهور.

وفجأة ظهرت واقعة تمويلات بقيمة 319 مليون جنيه مرتبطة بأسماء أولياء أمور مدرسة، رغم أن أصحاب الأسماء -بحسب ما أعلنته الرقابة المالية- لم يكونوا على علم بهذه المديونيات.

وهنا بقى لازم نرجع لكلام عز العرب لأن أصل المشكلة اللي كان بيتكلم عنها هو أن البنوك بتخضع لمعايير شديدة الصرامة من البنك المركزي في منح الائتمان وتقييم قدرة العميل على السداد.

بينما شركات التمويل الاستهلاكي لا تخضع لقواعد البنك المركزي نفسها، وإنما تخضع لمنظومة رقابية مختلفة تحت الهيئة العامة للرقابة المالية.

وده مش معناه إن كل شركات التمويل سيئة، لكن معناه إن أي فجوة في: KYC، سواء التحقق من هوية العميل، موافقته على التمويل، الاستعلام الائتماني، وتقييم قدرته الحقيقية على السداد، ممكن تتحول من مشكلة فردية إلى مشكلة في سوق الائتمان كله.

والواقعة الأخيرة بتطرح سؤال أخطر من الـ319 مليون نفسهم: إزاي 839 عقد تمويل بالقيمة دي قدروا يعدّوا قبل ما حد يتأكد بشكل مباشر وقاطع إن أصحاب الأسماء طلبوا التمويل أصلًا؟

المثير أكتر إن بعد الجدل اللي أثارته تصريحات عز العرب، الرقابة المالية بدأت بالفعل سلسلة إجراءات وتشديدات على الإقراض غير المصرفي.

يعني الراجل لما حذر، ماكانش بيحارب شركات التمويل، كان بيقول إن الائتمان لما يكبر أسرع من الرقابة عليه، الخطر بيكبر معاه، واتهاجم وقتها لأنه قال الكلام بدري.

والنهارده السؤال مش: هل هشام عز العرب كان بيبالغ؟، والسؤال الحقيقي: يا ترى واقعة الـ319 مليون حالة منفردة…
ولا دي أول حالة كبيرة اتكشفت؟

لأن في عالم الائتمان، المصيبة مش إن العميل مايسددش، المصيبة إنك تكتشف إن فيه عميل أصلًا ماكانش يعرف إنه اقترض.