مستشفى الناس يفتتح مبنى «أنسي ساويرس» بحضور عائلته تخليدا لذكري عطاءه.. نجيب ساويرس: أشكر أيمن عباس على تكريم اسم والدي ومجهوده بالمستشفى.. نجله أنسي: منبهر بما رأيته.. وأيمن عباس: الراحل كان مصري جدع

> نجيب ساويرس: أيمن عباس يمنح وقته ومجهوده في مكان يخفف آلام الناس
> ساويرس: مستشفى الناس يوفر أعلى جودة طبية في العالم للمرضي بدون مقابل
> نجيب ساويرس: أيمن عباس يمنح وقته ومجهوده لمستشفى الناس على حساب أسرته وعمله
> ساويرس: الدكاترة في مستشفى الناس شغالين بقلبهم لعلاج الفقير والغني بدون تفرقه
> أنسي نجيب ساويرس: أيمن عباس بيتكلم عن المستشفى من قلبه
> أنسي: والدي قدوة لينا بحاول أتعلم منه ومن اللي شوفته في المستشفى النهارده
> أيمن عباس: أنسي ساويرس مكنش يتأخر عن أي حد يطلب منه العون
> رئيس مجلس أمناء مستشفى الناس: العطاء مش بعيد عن أسرة ساويرس
> عباس: عطاء وتكاتف المجتمع المصري يخلونا نقدر نعمل حاجات كتير
> أيمن عباس: أنا معملتش غير حب المكان ده والمصريين متأخروش عننا
> أمين صندوق مؤسسة الجود الخيرية: احنا كلنا مع بعض قدها ونقدر
> عباس: حلمنا كبير هنكمله بافتتاح كل الأسرّة وإن شاء الله نبقي في الصعيد والدلتا

نظم مستشفى الناس الخيري، حفل افتتاح مبني «أنسي ساويرس»، الذى يحمل اسم والد رجلا الأعمال نجيب وسميح ساويرس، ويأتي إطلاق اسم رجل الأعمال الراحل أنسي ساويرس مؤسس ورئيس مجموعة أوراسكوم، على أحد مباني المستشفى، تخليدًا لذكراه ومسيرته في العطاء ودوره الكبير الداعم للعديد من المؤسسات الخيرية المؤثرة في المجتمع المصري.

جاء حفل افتتاح مبنى «أنسي ساويرس» بمستشفى الناس بحضور عدد من قيادات المستشفى وأسرة ساويرس، في مقدمتهم رجل الأعمال أيمن عباس، أمين صندوق مؤسسة الجود الخيرية، ورئيس مجلس أمناء مستشفى الناس، ورجل الأعمال نجيب ساويرس، رئيس مجلس إدارة شركة أوراسكوم للاستثمار القابضة، هذا إلى جانب رجل الأعمال أنسي نجيب ساويرس، وبعض أفراد العائلة، وكذلك حاتم الملا، المدير التنفيذي لمستشفى الناس، وعدد من قيادات المستشفى من الفرق الطبية والإداريين.

بدوره، قال رجل الأعمال نجيب ساويرس، رئيس مجلس إدارة شركة أوراسكوم، خلال الاحتفال: «عايز أشكر أيمن على تكريمه لاسم والدي، وعلى المجهود اللي بيقدمه هنا في المستشفى وهو مجهود غير طبيعي، خصوصًا إنه قرر مع نفسه إعطاء وقته ومجهوده لكل الناس اللي بتتعالج هنا على حساب أسرته وشغله، ومفيش ناس كتير بتعمل زيه كده».

وأضاف: «العطاء المالي حاجة والدعم حاجة، وإنك تحط وقتك ومجهودك في مكان يشيل عن الناس الآلام ويعالج اللي اتحرق، ويعالج الأطفال اللي لسه مولودين وعندهم تشوهات، بلا مقابل، ده تحدي، وأيمن حاطط على نفسه كمان ضغط شديد جداً لأنه قرر يجيب أعلى مستويات من الجودة الطبية في العالم من غير أي مقابل من الناس، وده تحدي جامد أوي».

وتابع: «ده أمر يستدعي إن أي حد ربنا أكرمه إنه يقف معاه، ومش هيلاقى حد أحسن من كده يقف معاه، احنا شوفنا حاجة هنا ما شوفناهاش حتى في أمريكا، وبعدين تحس الدكاترة هنا عندهم قلب، والدكتور اللي عنده قلب، غير الدكتور التجاري، فكل واحد بيشتغل هنا عنده قلب، ومستوى غير موجود في أي مكان، الفقير موجود، والغني موجود، الكل هنا ومفيش تفرقة الحمد لله».

من جانبه، قال رجل الأعمال أنسي نجيب ساويرس: «طبعاً أنا بشكر المهندس أيمن، وبشكر والدي على كل حاجة بيعملها كقدوة لينا أنا وأخواتي وجيلنا كله، ودي نقطة بالنسبة ليا بعتبرها مسؤولية إني أحاول أعمل زي ما هو بيعمل وأتعلم منه، وبالنسبة ليا برده إني أشوف اللي اتعمل هنا وأشوف الاهتمام بكل تفصيله موجودة في المكان، ده كمان مسئولية عليا».

وأضاف: «شوفت المهندس أيمن وهو بيشرح ازاي بيتكلم من قلبه، وبيشرح كل حاجة، أنا انبهرت وحاطط النقطة دي ادام نفسي إني أحاول أستفاد جداً من اللي عملوه هنا، وأستفاد من دعم والدي، إني أحاول إن شاء الله أكون عند حسن ظنهم في المستقبل، وإن شاء الله الأجيال الجايه كمان تقدر تعمل أكتر وأكتر».

فيما، قال المهندس أيمن عباس، رئيس مجلس أمناء مستشفى الناس الخيري: «العطاء مش بعيد عن أسرة ساويرس، الله يرحمه أنسي بيه كان راجل بسيط ومصري جدع وشهم، ومكنش يتأخر عن أي حد يطلب منه أي نوع من العون، وده سبحان الله بتلاقيه على طول في باقي الأجيال من أولاده وأحفاده اللي ميقلوش عطاءً عنه، واحنا في المجتمع المصري بالعطاء اللي عندنا ده نقدر بالتكاتف نقدر نعمل حاجات كتير».

وأضاف: «أنا معملتش أي حاجة غير إني حبيت المكان، وكل الناس اللي أنا بحبها وعارف قد إيه عندهم عطاء كنت متأكد إنهم لو لقوا في جدية مفيش حد هيتأخر عن المكان، والمصريين كلهم متأخروش، واحنا عندنا حلم كبير إن شاء الله هنكمله وهنفتتح كل السراير، وإن شاء الله نبقى في صعيد مصر، وإن شاء الله نبقى في دلتا مصر، وإن شاء الله بإذن واحد أحد مفيش حد نتأخر عليه، واحنا كلنا مع بعض قدها ونقدر».

هذا وتُعد مستشفى الناس، التابعة لمؤسسة الجود الخيرية، واحدة من أبرز وأضخم المشروعات الخيرية الطبية في مصر والشرق الأوسط، والتي افتُتحت عام 2019 بطاقة استيعابية تصل إلى 600 سرير و10 غرف عمليات و148 وحدة رعاية مركزة و48 عيادة خارجية، وتُقدم خدماتها الطبية بالمجان تمامًا في تخصصات دقيقة تشمل جراحات القلب للأطفال والكبار، الجهاز الهضمي، أمراض السكر، الحروق، وتستعد قريبًا لإطلاق أكبر وحدة لزراعة الكبد في المنطقة.