أسرة العندليب تصدر بيان للرد على المتطاولين بعد إعادة منزله

عبرت أسرة العندليب الفنان الراحل عبدالحليم حافظ عن إستيائها الشديد من التعليقات السيئة التي انهالت عليه بعد إعادة فتح صفحته عبر “فيسبوك”، وإتاحة زيارة منزله مرة أخرى.

وأصدر الأسرة بيانا من خلال صفحة منزل عبدالحليم حافظ عبر “فيسبوك”، والذي جاء كالتالي: “توضيح مهم يا ريت كل الأعضاء المحترمين في هذة الصفحة لو عندهم وقت يقروه، أنا بعتذر منكم بس أي حد من ساعة ما رجعنا الصفحة تاني بقي بيتطاول علي الأسرة في التعليقات بشكل مهين بقيت بحذف تعليقاتة و بعملوا بلوك فوراً”.

معنديش مشكلة في أي نقد

وأضافت: “أنا معنديش مشكلة في أي نقد أو أختلاف في الرأي بس عندي مشكلة في التطاول و عدم الأحترام اللي بقت للأسف سمة و صفة في السوشيال ميديا و طلعت أوحش ما فينا، إحنا أخر مرة قفلنا فيها الصفحة في ناس كتيير زعلت مننا و طلبت مننا نرجع علشان الصفحة كانت مهمة بالنسبالهم و فيها صور و معلومات جديدة و متنوعة جماهير حليم المحترمة محتاجاها و طرح مختلف عن باقي الصفحات الخاصة بحليم”.

رجعنا بحاجة جديدة علشان بنحبكم 

وتابعت: “لما رجعنا، رجعنا بحاجة جديدة و مختلفة علشان بنحبكم و بنقدركم و هي صفحة منزل حليم الرسمية اللي من خلالها تقدروا تعرفوا معلومات عن منزل حليم و تقدروا تحجزوا لزيارة المنزل مجاناً، وقررنا أننا زي ما بنحترم حضراتكم و بنقدركم إننا كمان منقبلش بأي تطاول يمس أي فرد سواء كان من الاسرة او حتي يمس أي أحد من الأعضاء في هذة الصفحة أيضاً لأنكم جزء لا يتجزء من أسرة حليم، و أظن دة حقنا عليكم و حقكم أيضاً علينا”.

أنتم ظهر وسند للأسرة

و أخيراً أنا عايزكم تعرفوا حاجة واحدة بس، أنا بتعامل مع كل الأعضاء المحترمين في هذة الصفحة أنهم جزء من العائلة و بفرح لما بلاقي الناس بتتفاعل معانا أو حتي تنصحنا أو تنتقدنا نقد بناء أو تقترح أقتراح مفيد و لما بحط بوست إن في مشكلة بتواجهنا او أنتقاد لموقف معين مش علشان عايز أعمل تريند أو أوصل صوتي لحد لأن احنا عندنا تواصل مع كل الصحف و المواقع و القنوات و لكن علشان بحس إن أنتم ظهر و سند للأسرة و نصيحتكم بتبقي غالية علينا قوي والله و بحس إن من حقكم و واجبنا عليكم تعرفوا كل حاجة بتحصل تخص حليم..

 الصفحة دي متسواش عندي "نكلة"

في حد زعل مني لأني البوست اللي فات قولت الصفحة دي متسواش عندي "نكلة" جايز يكون خاني التعبير بس اللي أقصدوا إني مش عامل الصفحة دي للتربح أو أني ألم شير و لايكات و شهرة زائفة لأني عندي شغلي و حياتي الخاصة بعيداً تماماً عن الفن و حقيقي ولا يفرق معايا حتي لو عدد الأعضاء في هذة الصفحة 10  أعضاء فقط أو حتي عضو واحد".

 هفضل بردة أنزل أخبار عن حليم

 هفضل بردة أنزل أخبار و صور و مواضيع شيقة عن حليم لأني بعمل الموضوع دة بحب و إخلاص لحليم و لمحبية فقط مش للإعلام و الصحافة و لا للايك و الشير و بكتب و بتكلم من قلبي و مش بعرف للأسف ألون الكلام و يمكن دة عيب خطير فيا بس معلش أستحملوني لو تقدروا، شكراً لتفهمكم ، إنتظروا النهاردة الساعة 6 مساءً صورتين جداد لحليم فيهم خفة دم و تلقائية و براءة و ضحك، معتقدش الصورتين دوول في حد شافهم قبل كدة و هناك المزيد و المزيد قادم". 

بلاغ للنائب العام

وكان مكتب المستشار ياسر قنطوش قد أعلن منذ يومين تقديم أسرة العندليب بلاغا رسميا لنائب العام الكويتي المستشار ضرار العسعوسي  لإيقاف حفلين منسوبين للفنان الراحل دون الحصول على إذن مسبق من العائلة، مما يعتبر انتهاكها حقوق الملكية الفكرية الخاصة بهم.