تأكيدا لموقع بصراحة.. محمد سراج الدين يعتذر عن خوض انتخابات الأهلي القادمة

أصدر محمد سراج الدين عضو مجلس إدارة الأهلي بيانا رسميا، أعلن من خلاله موقفه الأخير من الترشح في انتخابات مجلس إدارة الاهلي القادمة.

بيان محمد سراج الدين

"البيان ده بكتبه لتوضيح أمور كتير اتكتبت واتقالت في  الأسبوعين اللي فاتوا بخصوص الإنتخابات وموقفي منها وفضلت الصمت التام لحين انتهاء مبارة الزمالك الهامة بالأمس لأنها أهم من أي شئ وموقف الفريق أهم مننا كلنا كأشخاص واللي بتمنى يارب ينتهي على خير وبالتتويج بكل البطولات.

ما تم إثارته الفترة الماضية عن عدم رغبتي في الترشح هو صحيح بس اللي مش صحيح الأسباب اللي طلعت وأني مش عايز ومش حابب عشان مش فاضي وعشان شغلي ده مش حقيقي أو بعض المزايدات أصله شكله رايح نادي تاني في مصر دي طبعاً كانت مثار تعجب بالنسبالي ومستحيل تحصل نفسياً قبل مهنياً.

ومواقفي السابقة واضحة وجودي وخدمتي في النادي الأهلي ده شرف كبير أوي وهو اللي عمل اسمي والأساس عندي في أي توجهات أو معايير بتكون بلدي مصر أولاً والنادي الأهلي مفيش حد ولا حاجة تانية في دماغي والحمد لله كل الثقة والتشجيع اللي بستقبلهم من الجمهور والأعضاء على مدار سنوات ده اللي استمدت منه الشغف اللي كان بيخليني أعرف أكمل.

يمكن الدورة دي من بدايتها لم تكن سهلة عليا في أمور كتير ويمكن بالأخص أخر عام وانا واخد القرار بيني وبين نفسي بشكل نهائي من سنة ومبلغه للمجلس الموقر رسمياً من حوالي ٥ شهور وده كان قبل كأس العالم للأندية بأمريكا في غرفة مغلقة وبرضه التزمت الصمت حفاظاً على الإستقرار وأسباب الاعتذار لا أفضل الحديث فيها لأن مش ده اللي اتعودنا عليه جوه بيتنا الحديث في مشاكل أو أسرار داخل البيت على الملأ.

اعتذار محمد سراج الدين عن انتخابات الأهلي

وعليه فأنا لا أرغب في الترشح أو التواجد في الفترة الحالية وأقصد الدورة المقبلة وده ممكن يكون قرار بعيد عن قلبي تماماً بس هو قراري ومن عقلي ومن سنة ولم أتراجع عنه ولنا عودة قريبة إن شاء الله إذا أراد ربنا وشكراً جزيلاً لكل من ساندني أو لم يساند وبعتذر عن أي أخطاء صدرت مني ضايقت أي حد أو أي تقصير حصل في أي ملف.

هفضل فخور أن ربنا جعلني من الأسباب إني ساهمت مع كابتن محمود الخطيب ومع المجلس السابق والحالي على مدار ٨ سنوات وقبلهم سنوات تانية كنت بسعى وبدرس بقوة وبإخلاص وشغف حقيقي وبشهادة الكابتن وبشهادة الجميع داخل النادي في رسم رؤية ودراسة الملف والمشروع الأضخم في تاريخ النادي وحلم كل الأهلاوية وهو الاستاد لحد ما اتحققت أولى الخطوات بفضل الله وكملت على ما تم بنائه شركة محترمة قوية لديها الإمكانات والفكر المسيرة والتنفيذ ربنا يوفقهم في تحقيق الحلم.

من أمنياتي أحضر فيه مبارة للأهلي قريباً وفي النهاية والأهم إيماني بقضايا وملفات معينة لم ولن يتغير ولست نادم عليها وعلى مواقفي تجاهها مطلقاً بالعكس شكراً أعظم جمهور في الكون جمهور النادي الأهلي".