«حلم ما اكتملش».. حكاية مصري فارق الحياة في أول يوم له بالإمارات

روى المذيع والانفلونسر حسين الجوهري عبر حساباته على مواقع التواصل الاجتماعي، تفاصيل صادمة عن وفاة شاب مصري مغترب، توفي في أول يوم له بالإمارات، قائلاً: "جالي تليفون من أحد أصدقائي بيقولي: في شاب مصري، جاري، مات في الإمارات يا حسين، شوف الموضوع... اتصدمت لما عرفت إنه مات في أول يوم له في البلد! نزل من الطيارة، نام... ومات."

القنصلية المصرية فتحت أبوابها خصيصًا لإنهاء الإجراءات

وأضاف حسين: “الورقة اللي قدامكم دي، القنصلية المصرية فتحت مخصوص بعد ما قفلت، ونزلوا الموظفين علشان يطلعوها لي. بقالي أكتر من 5 أيام بخلص في إجراءات لحد أنا شخصيًا مشوفتوش قبل كده. أهله عملولي توكيل، وهما معرفونيش غير من خلال صديقي”.

وتابع: “دخلت التلاجة علشان أتعرف عليه، وأنا معرفوش، وبكلمه: اطمن، أنا فلان، وجيت علشان أرجعك لأهلك اللي مستنيينك”.

القصة لاقت تعاطفًا كبيرًا من الجميع

وأكد أن القصة أثرت في كل من سمعها، قائلاً: “كل اللي بحكيله بيبقى عايز يساعد، محدش مصدق إنه توفى أول يوم له في البلد! القنصلية المصرية والسفير المصري وشرطة دبي، كلهم وقفوا معايا، وجروا علشان نخلص الإجراءات”.

رسالة ودعاء من قلب موجوع

واختتم رسالته بقلب موجوع: “شاب كان جاي يبدأ حياة جديدة، ملحقش حتى يصحى، ورجع لأهله في تابوت... ادعوله بالرحمة”.