عماد النحاس: أتمنى أكون موجود في الأهلي دايما.. وهذا موقف أحمد عبد القادر مع الفريق

أعرب عماد النحاس المدير الفني المؤقت للنادي الأهلي، عن سعادته بتوليه هذا المنصب من جديد، وقيادة الفريق خلال هذه الفترة.

تصريحات عماد النحاس

قال عماد النحاس: “إن شاء الله تكون بداية خير ونقدر نعوض اللي حصل، ونبارك لكابتن وليد صلاح الدين عودته لبيته”.

وتابع عبر برنامج حارس الأهلي: “عادل مصطفي من اختياري؟ كلنا من ولاد النادي، الأسماء كانت مطروحة كتير كلها محترمة، وكله كان عنده حماس أنه يبقي موجود”.

وأضاف: “اتبلغنا تلفونيا، أن بكرة هيكون أول اجتماع وهيبقي عندنا تفاصيل كاملة، ومين لا يتمنى أن يستمر في الأهلي لكن أهم شيء هو مصلحة النادي”.

وأردف: “مين ميتمناش يبقى موجود في الأهلي، ده لو لمدة يوم، حتى لو في أصعب الظروف، لو هيتطلب مننا نبقى موجودين هنكون موجودين برضو، الفترة هتبقى قد إيه الله أعلم، احنا حاطين مصلحة النادي رقم واحد وده اللي اتربينا عليه في النادي الأهلي”.

وذكر: “في تشابه بين تولي المسئولية السنة اللي فاتت، ست مباريات ومينفعش تخسر نقطة ونفس الأمر السنادي مينفعش تخسر نقطة”. 

وواصل: “وعندنا حاجات لازم نشتغل عليها، ولازم نقعد مع نفسنا كتير ونتكلم كتير، والمجموعة مميزة وان شاء الله التوفيق يبقي معانا”.

أزمة أحمد عبد القادر ومواعيد المران

وعن أحمد عبد القادر أوضح: “تحدثت مع الكابتن محمد يوسف عن موقف أحمد عبدالقادر، وبنسبة كبيرة سيكون موجود معانا، ولا يوجد أي مشكلة، ولو في اختلاف أو وجهة نظر رؤية إدارة النادي هي الأهم في النهاية”.

وزاد: “هناك عدد من اللاعبين المصابين سوف يلحقون بمواجهة إنبي القادمة، وعودة هؤلاء العناصر سوف تمنح الفريق افضلية.. وفترة التوقف تكون مفيدة بالنسبة لنا”.

وأكد: “لم أغير مواعيد التمرين، مران الغد في السادسة مساءًا، وريبيرو كان له وجهة نظر في التدريبات الصباحية، وجوزيه كان يُدرب الفريق صباحًا، سوف نبحث الافضل بالنسبة لنا ونقوم بتنفيذه في المرحلة المقبلة”. 

وأتم عماد النحاس حديثه: “وارد الفريق يتمرن في الثامنة صباحًا قبل ارتفاع درجات الحرارة، أو عصرًا، كان هناك شكوى من اللاعبين بسبب ارتفاع الحرارة، لكن المشكلة كانت في النتائج”.