وفد «برزنتيشن لايف» برئاسة محمد مرجان يزور مستشفى الناس ويدعو لدعمها بالتبرعات

 محمد مرجان: الأفكار والحلم وحب مساعدة الغير هم أساس نجاح مستشفى الناس

 رئيس «برزنتيشن لايف»: مستشفى الناس صرح عالمي على أرض مصر ولازم ندعمهم

 إسلام الشاطر: مستشفى الناس صرح عالمي يضم أعظم أطباء في العالم

 إسلام الشاطر: بطلب من الجميع التبرع لمستشفى الناس لأنها تستحق

 إيهاب الخطيب: مستشفى الناس الأفضل في العالم بفضل تبرعاتكم وجهود القائمين عليها

أجري وفد من شركة برزنتيشن لايف، برئاسة العميد محمد مرجان رئيس مجلس الإدارة، زيارة لمستشفى الناس الخيري لعلاج أمراض القلب والجهاز الهضمي والسكري بالمجان، يرافقه مجموعة من قيادات الشركة، وذلك تأكيدًا على دور الشركة في دعم المبادرات الإنسانية والمجتمعية ولبحث سبل التعاون.

استقبل وفد شركة برزنتيشن لايف، في زيارتهم الهامة، عدد من قيادات مجلس الإدارة بمستشفى الناس، على رأسهم، المهندس أيمن عباس، أمين صندوق مؤسسة الجود الخيرية، ورئيس مجلس إدارة مستشفى الناس، والأستاذ حاتم الملا، المدير التنفيذي لمستشفى الناس.

بدوره، أشاد العميد محمد مرجان، رئيس مجلس إدارة شركة برزنتيشن لايف، بالدور الطبي والخدمي الذي تقدمه مستشفى الناس لعلاج الأطفال والكبار من مرضى القلب والجهاز الهضمي والسكري، بالمجان، بما يخفف الأعباء عن كاهل غير القادرين، ويمنحهم في الوقت ذاته القدرة على تلقى العلاج بشكل كريم ولائق وبجودة عالية جدًا.

وقال العميد محمد مرجان، رئيس مجلس إدارة شركة برزنتيشن لايف، في كلمته على هامش الجولة: «عايز أشكر القائمين على العمل الرائع اللي احنا موجودين فيه النهارده وهو الصرح الجميل جدًا مستشفى الناس، وبشكر الصديق العزيز أيمن ممدوح عباس، أمين الصندوق في المستشفى والقائم على العمل بها، والمدير التنفيذي حاتم الملا، والحقيقة أنا شوفت حاجة رائعة جدًا».

وأضاف العميد محمد مرجان: «يمكن النجاح اللي شوفته ده أول مرة ألمسه، احنا سمعنا كتير وساعدنا كتير، لكن لما جيت النهارده شوفت الحب الموجود، وشوفت نجاح الإدارة التنفيذية، ونجاح الفكر الموجود ده والحلم بيتحقق للناس كلها، وازاي هما مبسوطين وبيشتغلوا بحب وعايزين يساعدوا الأطفال ويساعدوا الحالات الحرجة جدًا غير القادرة في ظل إن كل أب وكل أم بيدوروا ازاي يعالجوا ابنهم أو بنتهم عشان يفرحوا بيهم».

وتابع رئيس مجلس إدارة شركة برزنتيشن لايف: «اللي شوفناه النهارده أقدر أقول إنه حاجة فخور وسعيد بوجودها في مصر، وفعلًا زي ما بنقول مستشفى عالمية على أرض مصرية ودي حقيقة تحت إدارة محترمة جدًا وفريق عمل بيشتغل بحب، ولما جيت هنا النهارده ولمست ده فأنا بقول لازم الفترة اللي جايه يكون لينا دور ونساعد بجد وبقلب، ولازم الناس كلها تشارك وتيجي تشوف إن في حاجة عظيمة جدًا في مصر، والمستشفى دلوقتي مش بتعمل عمليات قلب، لكن بقي في علاج للحروق والجهاز الهضمي، وفي دكاتره على أعلى مستوى».

واستطرد العميد محمد مرجان، رئيس مجلس إدارة شركة برزنتيشن لايف: «عايز أقول إن أي نجاح يبدأ من الإدارة التنفيذية، وأنا شوفت فعلا إدارة وضعت قواعد ونظام عمل، وفي الآخر فريق طبي وفريق تمريض وفريق عمل دخل جوه النظام ده، وده في رأيي الشخصي سبب نجاح المنظومة واللي هي مستمرة وإن شاء الله تفضل مستمرة، وربنا يوفقكم جميعا ويجازيكم كل خير على الجهد اللي بتبذلوا وده أكيد عند ربنا حاجة كبيرة جدا، واحنا بنقول النهارده إننا في ضهركم وهندعمكم ومعاكم في كل وقت إن شاء الله، وشكرا إن أنتم سمحتولنا إننا نكون موجودين معاكو النهارده».

وفى السياق ذاته، قال إسلام الشاطر مدير منتخب الشباب الحالي، ونجم الأهلي ومنتخب مصر السابق: «أنا سعيد جدًا بتواجدي في هذا الصرح الكبير جدا مستشفى الناس، من سنتين أنا كنت متواجد هنا والحقيقة الوضع كان مختلف تمامًا، وكل سنة بنشوف قد إيه المسؤولين عن هذا الصرح الكبير يستحقوا كل التحية والتقدير، لأننا في مكان عالمي على أرض مصر، حاجة جميلة ومحترمة جدا، والحقيقة عندهم فريق رائع جدًا من أعظم الأطباء الموجودين في العالم مش في مصر بس، وعندهم فريق على أعلى مستوي».

وأضاف إسلام الشاطر مدير منتخب الشباب الحالي: «المستشفى نفسها حاجة جميلة جدا، وأنا منبهر بالشكل العالمي اللي أنا شايفه في هذه المستشفى الرائعة وهذا الصرح الكبير، وعشان نكمل في مستشفى الناس مطلوب من كل الناس إن هي تتبرع لمستشفى الناس، لأنها بتعتمد في تشغيلها على تبرعات حضراتكم وأنتو اللي بتساهموا كل يوم في إجراء عملية قلب، عشان كده بقول لحضراتكم تبرعوا بشكل كبير ومكثف جدا خلال الفترة الجايه لمستشفى الناس لأنها تستحق هذا التبرع».

وتابع إسلام الشاطر نجم الأهلي ومنتخب مصر السابق: «إن شاء الله ربنا يكرمنا والسنة الجايه لما نيجي أو لو قدرنا نيجي كل شهرين تبقى حاجة جميلة جدًا ونشوف تطور كبير، ونتمنى يا رب إن حضراتكم كلكم تكونوا موجودين معانا، كل الشعب المصري وكل الشعب العربي وأي حد في العالم يقدر يتبرع، أتمنى إن هو يكون موجود في مستشفى الناس أو هذا التبرع يدخل جوه مستشفى الناس لأن بالفعل في حالات كثيرة جدا تستحق تبرع حضراتكم».

فيما، قال إيهاب الخطيب رئيس قناة مدرستنا: «المصريين عملوا برند اسمه مستشفى الناس لكل الناس، المستشفى دي بشهادة الأوروبيين اللي بيجوا هنا بقت واحدة من أفضل المستشفيات الموجودة على مستوى العالم في أكثر من تخصص وللأطفال ولأولادنا المصريين، ودا كله بتبرعاتكم أنتم وبجهود القائمين أستاذ أيمن عباس، والناس القائمين على هذه المستشفى العظيمة اللي بقت مفخرة عالمية مصرية»

وأضاف إيهاب الخطيب رئيس قناة مدرستنا: «بدعمكم ورؤيتكم هتوصل المستشفى دي إن يبقي ليها أكثر من فرع، ومهما أنا أو غيري نتكلم أو أنت تسمع مش هتقدر تتخيل الموجود على أرض الواقع، تعالي شوف بعينك وأحكم بنفسك، لكن حقيقي كلام وشغل الناس هنا حاجة فوق الوصف».

واختتم إيهاب الخطيب رئيس قناة مدرستنا، حديثه: «أنا قولت اللي شوفته ومستينكو كل واحد يجي ويسجل على صفحته هو شاف إيه في مستشفى الناس، والمستشفى محتاجاكم ومحتاج كل الناس يتبرعوا ويساندوا ويدعموا تجربة هي الأفضل في العالم مش في مصر بس».

ويشار إلى أن وفد شركة برزنتيشن لايف، الذي زار مستشفى الناس، برئاسة العميد محمد مرجان، رئيس مجلس إدارة الشركة، يضم كلًا من، إيهاب الخطيب رئيس قناة مدرستنا، وكابتن إسلام الشاطر، نجم الأهلي ومنتخب مصر السابق، وشادي أيمن مساعد رئيس مجلس الإدارة ورئيس القطاع التجاري، ومحمد فايز مدير إدارة الاستراتيجيات والتخطيط والمتابعة، وأمنية زاهر منتج فني أول، وهبه الله أحمد منتج فني، ومروة عزت مدير إدارة الموارد البشرية، وهاني إبراهيم مدير إدارة الإنتاج.