"خليتوا الموضوع يتعقد".. أول رد من حسام حبيب على أنباء خطوبته

استاء الفنان حسام حبيب من انتشار أنباء خطوبته بعارضة الأزياء الأردنية سارة، مشيرا إلى أن ما تم تداوله عبر مواقع التواصل الاجتماعي غير صحيح.

وقال حسام حبيب خلال لقائه ببرنامج "ET بالعربي": "الموضوع ما وصلش للخطوبة نهائي، الناس سبقت الأحداث وخلوا الموضوع يتعقد بدل ما يحصل فيه خير".

ونفى "حبيب" تماما ما تم تدوله من أنباء حول خطوبته معلقا: "مش عارف أقولهم إيه بصراحة، وأصلا الحاجة اللي بيتكلموا عنها دي عمرها ما وصلت لربع اللي بيتقال ده، مش عارف الناس عايزين مني إيه بجد، طول الوقت بتخربلي حياتي".

واستكمل حبيب مؤكدا على غضبه الشديد وقال: "إن كان في حاجة هما كده بوظوها، لأن أهل البنت ناس محترمين وليهم عادات وتقاليد، زي ما إحنا لينا عادتنا وتقاليدنا، وكنا بنحترم يعني إيه بنت، يعني ننفسن عليها كده، مش عارف إيه اللي حصل للمصريين؟! فين النخوة اللي كانت عند المصريين؟!.

ووجه الفنان حسام حبيب رسالة لجمهوره معلقا: "ابعدوا عن حياتي بقى، أنا مش عارف إيه ده! إمتى هتسيبوا الناس في حالها؟! عمرنا ما اتكلمنا عن مين خطب ولا مين اتجوز بالشكل ده، دلوقت بيتكلموا عن بنت وليها عائلة كبيرة علشان التريند، وبقى كل همهم الفيديو يجيب كام؟".

وأضاف حسام حبيب: "أنا مش عايز حد يتكلم عني، طلعت مع بسمة وهبة وقولت الجمهور بقى آخر همي وعلشان أوصل رسالة عني مش عايز تريند، وهو في فنان بيقول كده؟ هما اللي وصلوني لده!".

وبجانبه استكمل حسام حبيب: "كل شوية يطلعوا يقولوا إن حسام حبيب صرح، أنا صرحت فين؟ أنا ما قلتش حاجة لحد نهائي! وإزاي بيقولوا إن علاقتي بالبنت دي من سنين إزاي؟ وهى عندها كام سنة علشان يتقال كده؟!".

أشار "حبيب" إلى أنه سيخذ الإجراءات القانونية اللازمة تجاه كل من ينشر عنه أخبار كاذبه وعلق: "اللي جاي هيبقى وحش وهيبقى في قضايا، ولازم كل حاجة يكون ليها حدود، مش المفروض نتكلم عن أعراض الناس".

واختتم الفنان حسام حبيب حديثه مؤكدا على أنه لم يتغاضى مرة أخرى عن مثل هذه الشائعات، وقال: "أنا هشوف مين اللي كتب الكلام ده على لساني وهحبسه، لأن أنا ماقلتش لأي حد حاجة وهكبر المشكلة، لأنها بنت ناس كبيرة أوي في الأردن، فهندخل القضايا ونشوف بقى!".