تامر حسني لـ حسام حبيب:"اوعدني قدام الناس إنك ترجع تاني"

وجه الفنان حسام حبيب رسالة للفنان تامر حسني ورامي صبري، بعد نجاح أغنيتهما الجديدة “فعلا مبيتنسيش”،  التي طرحت مؤخرا، على موقع الفيديوهات الشهيرة اليوتيوب.

رسالة حسام حبيب لـ تامر حسني ورامي صبري

كتب حسام حبيب رسالة على حسابه الشخصي بموقع التواصل الاجتماعى تبادل الصور والفيديوهات الانستجرام، قائلا: "أنا بكتب كلمتين من قلبي مش عارف هي مباركة ولا شكر ولا درس وبداية جديدة لجيل أنا فخور إني أكون منه، إخواتي وأصحابي، تامر أنت من زمان وأحلامك وأفكارك كانت دايما تخص جيلك ودائما كنت بتتكلم معانا من واحنا صغيرين باسم جيلنا مش باسم تامر، بس أنت حلمت لجيلك وعلشان كده أنا فعلا فهمت يعني إيه نجم الجيل، كنت زمان فاهم إن المقصود بيها إنك الأنجح وده حقيقي، لكن النهاردة فهمت معناها الحقيقي: أنت النجم اللي حلم لجيله مش لنفسه ودلوقتي حلمك بيتحقق يا صاحبي".

وتابع متحدثا عن رامي صبري "والنجم الثاني أخويا صاحب أجمد صوت وإحساس، كان دايما بيقولي أنا بحلم وعندي هدف وهو كمان كان دائما مهتم إن إحنا كجيل لازم نشارك بعض ونقدم للناس حقيقة روح وفن الجيل ده، وكان بكل تواضع بيقول ده لكل فنانين جيله لحد ما التقوا النجمين اللي هدفهم صادق وطلعولنا إبداع مش بس في المزيكا لا والله في الروح والفكر".

وأضاف حسام موجها حديثه لـ تامر ورامي "أنتم فرحتوني وأمتعتوني وخليتوني أفتخر إني من الجيل ده، اللي إن شاء الله عمر فنه وإبداعه ما هيخلص.. شكرا إنكم فتحتم نفسي ورجعتوني أحب المزيكا يمكن اكتر من الأول يا جيل جامد وجامد قوي كمان، أنتم فعلا متتنسوش".

رد تامر حسني على رسالة تامر حبيب 

قام الفنان تامر حسني بإعادة نشر استوري حسام حبيب على حسابه الشخصي بموقع التواصل الاجتماعى تبادل الصور والفيديوهات الانستجرام، معلقا، عليها:"حبيبي يا حسام إيه الكلام الجميل ده، طول عمرك محترم وإنسان نضيف وفنان كبير، لو استفزناك بجد يلا ارجع زي الأول وأكتر، ارجع متعنا بأغانيك الراقية الجميلة والمزيكا الأجمل، لأن ليك جمهور كبير بيستنى شغلك وأكيد ليهم حق عليك يلا صفحة جديدة مع مشوارك من النهاردة، يلا اوعدني قدام الناس إنك ترجع تاني".

رد حسام حبيب على تامر حسني:"أوعدك يا نجم الجيل".

أغنية فعلاً مبيتنسيش

أغنية "فعلا مبيتنسيش" تحصد إعجاب الجمهور
يذكر أن أغنية "فعلا مبيتنسيش" تم طرحها مؤخرًا عبر قناة تامر حسني على موقع "يوتيوب"، وحققت صدى واسعًا بين الجمهور، الأغنية من كلمات عمرو تيّام، ألحان شادي حسن، توزيع طارق توكل، وإخراج تامر حسني.