متعاطفة مع أي ست بتتخان.. أميرة بدر تدافع عن بسمة بوسيل بعد الهجوم عليها

حرصت الإعلامية أميرة بدر بالدفاع عن الفنانة بسمة بوسيل، بعد الهجوم عليه بسبب تصريحاتها عن طليقها تامر حسني.

وقالت أميرة بدر: الناس بتهاجمها ليه؟ أنا مش فاهمة، وبتضايق أوي، وبتكلم دلوقتي كست، لما ست تهاجم ست، بتهاجموها ليه؟ واحدة طلعت على الملأ قدام الناس كلها، بتقول أنا اتخنت أنا اتوجعت أنا تعبانة، ليه الستات مابيحسوش ببعض".

أميرة بدر تدافع عن بسمة بوسيل

وأضافت أميرة بدر: على فكرة أنا بحب تامر حسني جدا، معرفوش معرفة شخصية، شوفته مرة أو مرتين في حياتي، بس هو شخص لطيف جدا، ومش معنى أن هو مغني ومحبوب إن انا أهاجم الست بالطريقة دي، وشوفت بسمة بوسيل قبل كدة في رمضان، وهي شخصية لطيفة جدا، واحدة طالعة بتقول أنا موجوعة وانا اتخانت وانا تعبانة، ليه مانحسش بيها.

وتابعت: والناس اللي طالعة بتقول كنتي فين وبقيتي فين وصور قبل وبعد، وهو كمان ليه صور قبل وبعد وهو كمان شكله اتغير، وكلنا بنتحسن وكلنا بنبقى احسن، واحدة متجوزة واحد بالشهرة دي، وحب الناس دا لازم تخلي بالها من نفسها وتغير من نفسها وتطور من نفسها، إيه العيب في كدة وإيه المشكلة في كدة، إذا كان كل دا والبنت مش خالصة، البنت مهتمة بنفسها وبتغير من نفسها ومش خالصة بردو، إزاي بتلوموها على حاجة زي كدة وبتقولوا لها "ما انتِ لسه عايشة في خيره"، طب ما هي مخلفة له 3 ولاد وسابت شغلها عشانه عشان هو طلب دا، وخلفت له أجمل 3 ولاد في الدنيا، وربتهم له وضحت، كل دا مايتحسبلهاش؟

أمير بدرة تعلق على تصريحات جليلة المغربية 

وعلقت أميرة بدر على تصريحات جليلة المغربية، قائلة: إيه كم الهجوم اللي فيه غل وعنف، وبعدين الصور اللي نزلت قبل وبعد دي لجان الكترونية، مين اللي ورا اللجان دي وليه؟ ليه كدة؟ إيه الأسلوب دا؟ وواحدة تروح تكتب لها على الملأ "اللي إنتي كنتي متضايقة منه أنا كنت بتمناه ودا حب هياتي من 12 سنة!" يعني إنتي كان نفسك من 12 سنة إنها تطلق؟ يعني إنتي من 12 سنة حاطة عينك جوا بيتها وجوا وخياتها ونفسك تاخدي جوزها منها! طب ما عندها حق تقول إنها كانت عايشة في غابة! أما واحدة زيك طالعة تقول أنا كان نفسي في جوزك من 12 سنة ودا حب عمري، ما دي إعلان صريح بالخيانة، وإزاي أساسا مسموح لها واحدة كانت نزوة تتكلم عن أم الأولاد بالطريقة دي، مش المفروض أصلا يتسمح لها تتكلم بالطريقة دي

واستكملت: لما واحدة تبقى بصة في حياتها وعايزة تاخد جوزها واتمنت جوزها واتمنت حياتها، إيه فيلم الرعب دا؟ وطالعة على الملأ تقول أنا نفسي فيه، أنا عايزة أقول حاجة لكِ وللستات اللي شبهك اللي أنا بشوفهم خرابين البيوت دول، مش مطلق بقاله سنتين، مجاش اتجوزك ليه؟ ما انتِ موجودة ومتاحة وطالعة بتقولي دا حب حياتي، ماتجوزكيش لإن أنتِ كنتي نزوة، في الآخر اختار تبقى دي أم أولاده ومختاركيش إنتي، إنتي بس عايزة شهرة طالعة تركبي على الموضوع عشان تتشهري.

واختتمت: "أنا متعاطفة مع بسمة، لأن هي في الآخر ست وأنا ست زيها وفاهمة هي بتقول إبه، فاهمة يعني إيه حد ممكن يبصي لي في حياتي ويبص لي في جوزي وأولادي، أنا حاسة بيها، فانا شايفة الستات اللي بيهجموها على السوشيال ميديا لمجرد إننا بنحب تامر حسني وبنحب نسمعه بتهاجموها ليه؟ عشان هي عملت ايه؟ اتجوزت وربت وخلفت 3 أولاد وبتحاول تهتم بنفسها، أنا معرفش الداخليات بردو، أنا بتكلم إنه ليه بنهاجم الست مش المفروض نهاجمها، الستات المفروض نقف جنب بعض، وأنا متعاطفة معها ومع أي ست بتتخان وموجوعة، لازم نقف جنب بعض".